Kasparov kritikon ashpër Gjokoviqin

Tenis

Kasparov kritikon ashpër Gjokoviqin

Më: 27 prill 2022 Në ora: 12:41
Kasparov kritikon ashpër Gjokoviqin

Gary Kasparov, mjeshtri i madh i shahut, e ka kritikuar tenistin serb, Novak Gjokoviqin, i cili i mbështeti sportistët rusë, për të cilët theksoi se ata që nuk e dënojnë luftën e shfarosjes nga presidenti Vladimir Putin në Ukrainë, në njëfarë mënyrë janë mbështetës të saj në heshtje.

Numri 1 i botës në tenis i kritikoi së fundmi organizatorët e turneut të madh të tenisit – Wimbledon, të cilët vendosën të mos i lejojnë të marrin pjesë tenistët rusë dhe ata bjellorusë.

Sipas tij, kjo është e papranueshme.

“Unë gjithmonë do ta dënoj luftën. Nuk do ta mbështes kurrë luftën pasi kam qenë edhe vetë fëmijë i luftës. E di se çfarë traume emocionale të mbetet. Në Serbi, ne krejt e dimë se çka kishte ndodhur në vitin 1999. Në Ballkan, i kishim disa luftëra në historinë e fundit. Sidoqoftë, unë nuk mund ta mbështes vendimin e Wimbledonin, mendoj se është një çmenduri. Kur politika përzihet në sport, rezultati nuk është i mirë”, kishte thënë Gjokoviq së fundmi.

Ndërkaq, Kasparov e përdori llogarinë e tij në “Twitter” për t’iu përgjigjur tenistit serb.

“Rusia ndoshta nuk po luan për t’u renditur, por ata po vrasin sipas kombësisë. Sportistët rusë të cilët nuk e dënojnë luftën ekstreme të Putinit në Ukrainë janë duke e mbështetur atë në heshtje.

Dhe, një serb që nuk e bën këtë është veçanërisht e pakuptueshme, duke e konsideruar historinë”, ka shkruar Kasparov, i cili e mban rekordin prej 255 muajsh si numër 1 në renditjen botërore të shahut.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat