Ferizaj ka barazuar serinë finale në 2:2, duke mposhtur Fer Volley-n në ndeshjen e katërt dhe duke siguruar finalen e pestë vendimtare për titullin e kampionit.
Klubi i volejbollit Ferizaj ka triumfuar me rezultat 3:1 (25:22, 25:22, 16:25, 25:13) ndaj kampiones në fuqi Fer Volley-t.
Ndeshja nisi me intensitet të lartë dhe rivalitet të madh.
Në setin e parë, Ferizaj u tregua më i saktë në momentet vendimtare, duke e mbyllur 25/22.
I njëjti skenar u përsërit edhe në setin e dytë, ku pavarësisht rezistencës së Fer Volleyt, Ferizaj ruajti qetësinë dhe fitoi sërish me të njëjtin rezultat 25/22.
Fer Volley reagoi në setin e tretë, duke rritur nivelin e lojës dhe duke dominuar këtë pjesë me rezultat 16/25, për ta rikthyer ndeshjen në lojë.
Megjithatë, në setin e katërt Ferizaj ishte dominues absolut, duke mos lënë hapësirë për befasi dhe duke e mbyllur bindshëm 25/13.
Kjo finale ka dhuruar spektakël të vazhdueshëm që nga fillimi i serisë.
Në ndeshjen e parë triumfoi Fer Volley me 3-1, ndërsa Ferizaj u kundërpërgjigj në të dytën me fitore dramatike 3-2.
Fer Volley mori sërish epërsinë me fitore të pastër 3-0 në ndeshjen e tretë, ndërsa tash Ferizaj barazon gjithçka në 2-2.
Gjithçka do të vendoset në finalen e pestë, ku njëra nga skuadrat do të kurorëzohet kampione e Kosovës..