Dita Ndërkombëtare e Vullnetarizmit është ditë e caktuar nga Asambleja e Përgjithshme OKB-së në vitin 1985 dhe u dedikohet të gjithë atyre vullnetarëve të shumtë anembanë botës, të cilët sakrifikojnë interesat e tyre personale, në interes të shoqërisë dhe komunitetit.
Me këtë rast Let’s Do It si njëra ndër organizatat që realizon aktivitete të ndryshme mjedisore vullnetare, sot do të shënojë Ditën Ndërkombëtare të Vullnetarëve duke shpallur vullnetarët e vitit 2020.
Ceremonia e shpalljes së vullnetarëve të vitit 2020 do të mbahet në zyret e Let’s Do It të cilat gjenden në rrugën “Pashko Vasa” në lagjen Pejton (Prishtinë), duke filluar nga ora 11:00.
Vullnetarët e vitit të cilët do të shpallen ditën e sotme, vazhdojnë të japin kontributin e tyre tash e sa vite në fusha të ndryshme në të mirë të vendit e shoqërisë.
“Ne i kemi dalluar ata më së shumti për kontributin e dhënë në fushën e mbrojtjes së mjedisit, në luftën ndaj COVID-19 si dhe në disa fusha të tjera mjaft interesante të cilat do të bëhen të ditura nesër. Shpallja e vullnetarëve të vitit ka qenë e planifikuar të jetë një event më madhështor, ashtu siç është edhe vet puna vullnetare, mirëpo për shkak të situatës me pandeminë është reduktuar numri i pjesëmarrësve dhe të ftuarve të tjerë. Me këtë rast, janë ndërmarrë edhe të gjitha masat e tjera për mbrojtje ndaj COVID-19!”, thuhet në njoftim.
