Zëvendësministrja në detyrë e Punëve të Jashtme dhe Diasporës, Liza Gashi, ka deklaruar se diaspora akademike shqiptare është një partner strategjik për zhvillimin e arsimit të lartë dhe shkencës në Kosovë.
Në fjalën e saj në forumin “Bashkë në Shkencë: Universiteti i Prishtinës dhe Diaspora Akademike”, të organizuar nga Universiteti i Prishtinës, Gashi nënvizoi se diaspora shqiptare përfaqëson një potencial të jashtëzakonshëm intelektual e profesional, i cili mund të kontribuojë ndjeshëm në forcimin e sistemit arsimor dhe shkencor të vendit, njofton MPJD.
Ajo theksoi nevojën për krijimin e një platforme të qëndrueshme dhe të koordinuar që do të mundësonte bashkëpunim të vazhdueshëm ndërmjet diasporës akademike dhe universiteteve në Kosovë. “Dëshira jonë është që Universiteti i Prishtinës të marrë rolin udhëheqës në zhvillimin e kësaj platforme, duke krijuar ura bashkëpunimi me akademikët shqiptarë anembanë botës”, tha Gashi.
Zëvendësministrja përmendi edhe nisma të suksesshme si Shkolla Verore e Universitetit të Prishtinës, e cila ka kontribuar në rikthimin e diasporës akademike dhe në krijimin e mundësive për bashkëpunim me studentët dhe profesorët vendorë.
Duke folur për ndërkombëtarizimin e arsimit të lartë, Gashi vlerësoi rëndësinë e partneriteteve që Universiteti i Prishtinës ka me institucione ndërkombëtare përmes marrëveshjeve të bashkëpunimit.
Ajo theksoi se Ministria e Punëve të Jashtme dhe Diasporës do të vazhdojë të mbështesë nismat që ndërtojnë një ekosistem të hapur e bashkëpunues. Në këtë kuadër, Gashi prezantoi programin “Citizen Diplomacy Fellowship”, që u ofron profesionistëve të mërgatës mundësi angazhimi në institucionet e Kosovës.
“Rezultatet e qëndrueshme ndërtohen hap pas hapi. Prandaj, do të vazhdojmë të punojmë me përkushtim për të ndërtuar një platformë bashkëpunimi që reflekton ndikim pozitiv në sistemin tonë arsimor”, përfundoi Gashi.
