Malisheva është në garë të fortë për vendin e parë në Ligën e Parë të Kosovës, në grupin A.
FC Malisheva renditet në pozitën e dytë me 26 pikë po aq sa ka edhe lideri apo kampioni vjeshtor Dukagjini i Klinës.
Kryetrajneri i ri i Malishevës, Arsim Thaçi, po e përgatit ekipin maksimalisht për pjesën e dytë të kampionatit.
Ai tha se janë duke e kompletuar ekipin në çdo repart.
“Stërvitjet janë duke shkuar mirë. Kemi filluar qe 10 ditë me stërvitje, jemi në fazën e kompletimit të ekipit me lojtarë në reparte ku ekipi ka pas nevojë”, tha Thaçi për gazetën “Bota sot”.
Malisheva ka zhvilluar edhe një miqësore, që ka qenë test i mirë për Thaçin.
“Kemi zhvillu edhe një ndeshje miqësore në Drenicë, ku kemi humbë me rezultate minimal, 1:0”, theksoi ai.
Fakti interesant është se në grupin A, 6-7 skuadra luftojnë për të hyrë në elitën e futbollit të Kosovës. Thaçi tha se grupi është shumë i fortë.
“Ky grup është shumë i fortë, ka ekipe shumë të forta siç është Dukagjini, A&N, Istogu, Liria, pra mendoj se do të jetë një gjysmë sezon shumë interesant”, përfundon Thaçi.
