Kroacia po vazhdon përgatitjet për ndeshjen e parë të Kampionatit Botëror kundër Anglisë.
Ekipi i drejtuar nga Zlatko Daliç është vendosur në Aleksandri, ku po stërvitet për përballjen që zhvillohet të mërkurën, më 17 qershor, nga ora 22:00 në Dallas.
Në konferencën për media folën futbollistët Mario Pashali ç dhe Nikola Vlashiç, të cilët u shprehën optimistë për paraqitjen e Kroacisë në Botëror.
Vlashiç komentoi edhe trajnerin e ri të klubit të tij, duke i uruar mirëseardhje dhe suksese te Torino.
“Ky është Botërori im i dytë. Shpresojmë ta përsërisim atë që bëmë në Katar, ku për mua ishte paraqitja e parë në Kupën e Botës”, tha Vlashiç.
Ndërkohë, Pashaliç theksoi se Kroacia ka një përzierje të mirë mes përvojës dhe rinisë.
“Kemi një kombinim të mirë të lojtarëve me eksperiencë dhe të rinjve që e kanë shfrytëzuar shansin e tyre. Disa prej tyre janë afër formacionit startues. Kjo na jep mundësi të përsërisim sukseset e së kaluarës”, u shpreh ai.
Sa i përket sistemit të lojës, Pashaliç tha se futbolli modern kërkon fleksibilitet.
“Shumica e lojtarëve janë mësuar me ndryshime të sistemit. Me katër mbrojtës kemi pasur sukses ndër vite, por shumë lojtarë aktivizohen në klube edhe me tre qendërmbrojtës. E rëndësishme është të fitojmë”, deklaroi ai.
Duke folur për përballjen me Anglinë, Pashaliç theksoi se mbrojtja kompakte do të jetë vendimtare.
“Faza defensive do të jetë kyçe, siç e ka theksuar edhe përzgjedhësi. Kundër Sllovenisë patëm probleme në tranzicionin defensiv dhe Anglia di ta shfrytëzojë këtë. Megjithatë, me topin në zotërim kemi cilësi t’u shkaktojmë probleme anglezëve”, tha Pashaliç.
