Tebas tallet me Florentino Perezin pas paralajmërimit për transmetimin falas të ndeshjeve evropiane

Futboll

Tebas tallet me Florentino Perezin pas paralajmërimit për transmetimin falas të ndeshjeve evropiane

Nga: B.S. Më: 21 nëntor 2026 Në ora: 12:51
Presidenti i La Ligës, Javier Tebas

Presidenti i La Ligës, Javier Tebas, ka ironizuar presidentin e Real Madridit, Florentino Perez, pas deklaratës së këtij të fundit se ndeshjet më të mëdha të garave evropiane do të transmetohen falas në Indi nga sezoni i ardhshëm.

Tebas reagoi përmes një postimi në rrjetin social X, duke vënë në pikëpyetje faktin se Pérez po prezanton planet televizive të organizatave evropiane përpara se ato të bëjnë njoftimet e tyre zyrtare.

“Florentino tani është bërë zëdhënësi zyrtar i UEFA-s, Asociacionit të Klubeve Evropiane dhe kompanisë UC3. Ai po i shpall planet e tyre televizive përpara se këto organizata t'i bëjnë vetë publike”, shkroi Tebas, duke e shoqëruar reagimin me një emoji ironike.

Perez paralajmëron transmetime falas në Indi

Reagimi i Tebasit erdhi pas fjalimit të Florentino Perezit në mbledhjen e anëtarëve të Real Madridit, ku presidenti madrilen prezantoi një plan të ri për transmetimin e futbollit evropian.

“Duke filluar nga sezoni i ardhshëm, do të jetë e mundur të ndiqen falas ndeshjet më të mëdha në Evropë në Indi, përmes një platforme online”, deklaroi Perez.

Ai bëri të ditur se bëhet fjalë për një marrëveshje me UEFA-n dhe Asociacionin e Klubeve Evropiane, ndërsa transmetimi falas në Indi do të shërbejë si një projekt fillestar, me mundësi që modeli të zgjerohet edhe në rajone të tjera në të ardhmen.

Perez kërkon dorëheqjen e Tebasit

Përplasja e fundit është vetëm një kapitull i ri në konfliktin e vazhdueshëm mes dy drejtuesve të futbollit spanjoll.

Gjatë së njëjtës mbledhje, Perez kritikoi ashpër Tebasin për qëndrimin e tij lidhur me çështjen Negreira dhe sulmet e mëparshme ndaj Real Madridit në rrjetet sociale.

“Duket se i gjithë sistemi i futbollit spanjoll dëshiron që ne të harrojmë atë që ka ndodhur. Kjo nuk mund të mbetet pa pasoja, sepse heshtja përballë këtyre ngjarjeve mund të jetë një formë tjetër përgjegjësie”, deklaroi Perez.

Ai më pas iu drejtua drejtpërdrejt presidentit të La Ligës:

“Tebasi, në vend që të ndihmonte në zbulimin e së vërtetës, zgjodhi rrugën e sulmeve ndaj Real Madridit në rrjetet sociale. Në tetor ai kaloi çdo kufi kur e krahasoi kanalin e Real Madridit me nazizmin dhe, në vend që të tërhiqej, vazhdoi të mbronte qëndrimin e tij”.

Perez e cilësoi këtë deklaratë si një fyerje ndaj viktimave të nazizmit dhe tifozëve të Real Madridit, duke kërkuar dorëheqjen e Tebasit.

Real Madridi ka paraqitur ankesë kundër Tebasit

Presidenti i klubit madrilen bëri të ditur gjithashtu se Real Madridi ka ndërmarrë hapa zyrtarë kundër kreut të La Ligës.

“Mosmarrëveshjet zgjidhen me argumente, jo me fyerje. Prandaj kemi paraqitur një ankesë kundër Tebasit në Këshillin e Lartë të Sportit, i cili i ka kërkuar gjykatës administrative ta shqyrtojë çështjen”, tha Perez.

Në fund të fjalimit, ai paralajmëroi se nuk do të tërhiqet nga kjo betejë.

“Integriteti i garës është vlera më e rëndësishme në sport. Pa integritet nuk ka besueshmëri dhe pa besueshmëri nuk ka të ardhme për futbollin”, përfundoi presidenti i Real Madridit.

Sot mund të lexoni Shfletoni kopertinat