Kriza politike në Kosovë po thellohet dita-ditës, duke nxjerrë në pah dobësinë e sistemit dhe mungesën e vullnetit të partive për të gjetur zgjidhje. Pamundësia për të zgjedhur kryetarin e Kuvendit, për të konsoliduar shumicën parlamentare dhe për të formuar institucionet e reja është tregues i qartë se vendi rrezikon të futet në një spirale të pafund bllokadash. Në vend që të ecet përpara, Kosova po rrotullohet në një rreth vicioz, ku interesat partiake mbizotërojnë mbi interesin qytetar.
Opozita po e përdor numrat për të penguar çdo kandidat të propozuar nga mazhoranca, ndërsa pushteti duket i paaftë të ofrojë një kompromis real që do të garantonte stabilitet. Në këtë mes, qytetarët po lodhen nga skenat e përsëritura: seanca që dështojnë, akuzat reciproke dhe një gjendje pasigurie që paralizon vendimmarrjen.
Historia politike e Kosovës ka treguar se sa herë që institucionet nuk arrijnë të funksionojnë, zgjidhja e vetme ka mbetur kutia e votimit. Sot duket se po i afrohemi pikërisht asaj rruge: zgjedhje të reja. Edhe pse asnjëra palë nuk e thotë hapur, era e zgjedhjeve tashmë ndjehet në korridoret e politikës. Deputetët nuk po shohin më nga kompromisi, por nga kalkulimet elektorale.
Pyetja që shtrohet është: A do të ketë vullnet për të shmangur zgjedhjet, apo ato janë bërë të pashmangshme? Nëse partitë nuk arrijnë të tejkalojnë ngërçin, atëherë qytetarët do të thirren përsëri për të vendosur. Mirëpo, mbetet të shihet nëse zgjedhjet e reja do të japin një zgjidhje përfundimtare, apo do të prodhojnë një tjetër bllokadë.
Një gjë është e sigurt: pamundësia për të krijuar institucionet po e çon Kosovën drejt zgjedhjeve të parakohshme. Era e tyre tashmë ndihet, por ende nuk dihet nëse do të jetë një freskim demokratik apo një përsëritje e të njëjtit skenar të stërpërsëritur.