Letër e hapur drejtuar institucioneve të Republikës së Kosovës

Opinione

Letër e hapur drejtuar institucioneve të Republikës së Kosovës

Nga: Prof. Asoc. Dr. Nijazi Halili Më: 27 prill 2026 Në ora: 14:07
Prof. Asoc. Dr. Nijazi Halili

Mbi përgjegjësinë politike dhe krizën e papranueshme të zgjedhjeve të përsëritura

Të nderuara institucione të Republikës së Kosovës,

Situata aktuale politike në vend ka arritur një nivel shqetësues të papërgjegjshmërisë institucionale dhe mungesës së vullnetit për stabilitet. Në vend të konsolidimit të shtetit dhe forcimit të rendit demokratik, Kosova po shtyhet vazhdimisht drejt cikleve të reja zgjedhore, të cilat nuk prodhojnë zgjidhje, por vetëm thellojnë krizën politike dhe institucionale.

Është e papranueshme që interesat afatshkurtra politike të partive dhe individëve të vendosen mbi interesin strategjik të shtetit. Ky qark i vazhdueshëm i zgjedhjeve, bllokadave dhe kalkulimeve politike e ka dëmtuar rëndë besimin qytetar në institucione dhe ka dobësuar funksionimin normal të shtetit.

Kosova nuk është pronë e askujt dhe nuk mund të trajtohet si instrument për pazare politike. Institucionet janë të obliguara të garantojnë stabilitet, jo të prodhojnë krizë. Çdo vendim që e çon vendin në zgjedhje të reja pa një domosdoshmëri reale politike apo kushtetuese përbën dështim të qartë të përgjegjësisë shtetërore.

Në këtë situatë kërkohet maturi politike, vetëpërmbajtje institucionale dhe mbi të gjitha përgjegjësi historike. Sepse çdo destabilizim i mëtejmë nuk është më thjesht gabim politik,  është dëm i drejtpërdrejtë ndaj shtetit dhe qytetarëve.

Kosova nuk ka nevojë për eksperimente politike. Ajo ka nevojë për stabilitet, institucione funksionale dhe udhëheqje që mendon për shtetin, jo për interesin e radhës zgjedhor.

Historia do të gjykojë jo vetëm vendimet që merren, por edhe heshtjen përballë krizës.

Me shqetësim të thellë për gjendjen institucionale,

Prof. Asoc. Dr. Nijazi Halili

Anëtar i Shoqatës së Shkencëtarëve të Kosovës

comment Për komente lëvizni më poshtë
Sot mund të lexoni Shfletoni kopertinat