Ndërkohë, që bllokada po vazhdon në Kuvend, LDK, përmes Lumir Abdixhikut, propozoi një Qeveri Uniteti si zgjidhje për krizën politike.
Ai këtë e ka quajtur këtë një “kontratë nderi” mes partive – ndonëse jo zgjidhjen ideale.
Agjenda 15 pikëshe e LDK-së parasheh:
1. Funksionalizimi i institucioneve kushtetuese. Qeveria e unitetit do të merret me departizimin e institucioneve. Pjesë do të jetë edhe riformatimi i plotë i bordeve të ndërmarrjeve publike. Besojmë se pa interferime partiake u japim frymë ndërmarrjeve.
2. Dakordimi i plotë për rritjen e pagave dhe zbatimin e ligjit.
3. Pakoja emergjente për menaxhimin e krizës energjetike dhe heqja e tvsh-s për çdo faturë të energjisë elektrike. Zgjidhje do t’i jepej edhe krizës së tanishme.
4. Nisja e projektit kombëtar për gazifikimin e Kosovës. Qeveria e unitetit s’mund të bëjë gjithë gazifikimin, por do të nis projektin dhe të dakordohemi që projekti të vazhdojë pas zgjedhjeve të reja të pranverës së 2026.
5. Rindërtimi i raportit me BE-në dhe SHBA-në. Kthimi i besimit politik përmes një qasje të përgjegjshme shtetërore është prioritet i Qeverisë së Unitetit. Do të përgatisim platformë unike nga të gjitha partitë për Dialogun me Serbinë. Ristrukturim i plotë i shërbimit diplomatik që është në kolaps të plotë pas 4 viteve të qeverisjes.
6. Brenda një shumice të tillë do t’i votonim marrëveshjet ndërkombëtare.
7. Vettingu në sistemin e drejtësisë.
8 . Fillimi i projekteve me rëndësi jetike për Kosovën.
9. Do të flasim për reformën kushtetuese në funksion të stabilitetit. Do të trajtonim edhe këtë praktikë që po kalojmë, se a do të duhet të kemi ndryshime kushtetuese. Pra të bëjmë një reset kushtetues.
10. Hartimi i strategjisë kombëtare për reformë të thellë në arsim.
11. Përgatitja për lojërat mesdhetare që po vijnë, e që janë në rrezik.
12. Reforma strategjike e sigurisë dhe mbrojtjes
13. Rishikimi i formulës për buxhetin e komunave
14. Përgatitja për zgjedhje brenda 10 muajve.
15. Mekanizmi i transparencës për periudhën kalimtare. Do të themelonim një mekanizëm monitorues mbi zbatimin e kësaj formule.
Nga familja e Haki Imerit kanë folur për “Bota sot”, sa i përket qeverisë së Unitetit, duke thënë se Lumir Abdixhiku po ndikohet nga PDK dhe SHIK, duke ndjekur një agjendë që dëmton LDK-në dhe e largon nga vlerat rugoviane, ndërsa i shërben interesave të jashtme, përfshirë ato të Edi Ramës.
“Lumir Abdixhiku, për fat të keq, po vepron nën ndikimin e PDK-së dhe strukturave të lidhura me SHIK-un, duke avancuar kërkesa që nuk përputhen me realitetin politik në vend, por që në thelb e fuqizojnë PDK-në dhe e dobësojnë më tej LDK-në. Ai është një parashutist politik që, përmes veprimeve të tij, ka minimizuar trashëgiminë e Ibrahim Rugovës dhe e ka devijuar partinë në një drejtim të huaj për filozofinë rugoviane – në ‘rrugën e re’ me bekimin e Edi Ramës”, thonë nga familja Imeri.
Tutje, thonë se Abdixhiku po vepron jashtë legjitimitetit që i takon fituesve të zgjedhjeve, duke i shërbyer interesave të PDK-së dhe oligarkëve, jo të LDK-së apo qytetarëve. Me këto veprime, ai po dobëson LDK-në si forcë qendrore dhe trashëgimtare e Rugovës, duke u shndërruar në zë të marrëveshjeve të fshehta dhe jo të anëtarësisë së partisë.
“LDK, si parti e tretë në skenën politike, mund të japë propozime, por legjitimiteti për iniciativa të tilla i takon fituesit të zgjedhjeve – LVV dhe GUXO. Veprimet e Abdixhikut janë kalkulime të mirëllogaritura që i shërbejnë PDK-së në planin afatgjatë, ndërsa e çmontojnë pozitën e LDK-së si subjekt i qendrës së djathtë dhe trashëgimtare e projektit rugovian.
Kërkesat që i bën publikisht nuk burojnë nga interesi i qytetarëve apo i LDK-së, por janë përpjekje për të shlyer borxhe politike ndaj oligarkëve që historikisht e kanë kapur shtetin përmes PDK-së. Ai nuk po përfaqëson zërin e anëtarësisë së LDK-së, por interesat e atyre që duan një opozitë të pafuqishme dhe një skenë politike të kontrolluar nga marrëveshje të nëndheshme” – theksohet për “Bota sot”.
