Organizatorët e Lojërave Olimpike “Tokio 2020”, pasi konfirmuan organizimin këtë verë të Olimpiadës, deklaruan se brenda pak ditësh do të bëjnë publike edhe masat shtesë që do të marrin për shkak të pandemisë Covid-19. Në Olimpaidën që zhvillohet në Japoni pritet të marrin pjesë 15.400 atletë (olimpikë dhe paraolimpikë).
Sipas mediave vendase, pritet që sportistët pjesëmarrës të testohen dy herë çdo 96 orë.
Ndërkohë që, ata do të testohen edhe pasi mbërritjes në Tokio. Komiteti Olimpik Ndërkombëtar (IOC) do të hedhë në qarkullim aplikacionin “playbooks”, një guidë për të gjithë pjesëmarrësit në Olimpiadë.
Pritet të mos ketë asnjë karantinë për sportistët që arrijnë në Tokio, në mënyrë që ata të stërviten menjëherë, për të ruajtur formën fizike. Gjithsesi, do të qëndrojnë në Fshatin Olimpik, duke mos patur mundësi të lëvizin përveç zonave ku do të zhvillojnë stërvitjen.
