Në kuadër të programit kombëtar “Sport në Shkolla”, për nder të 1 Qershorit – Ditës Ndërkombëtare të Fëmijëve, u organizua një aktivitet festiv në çerdhen publike “Gëzimi Ynë” në Viti, ku morën pjesë mbi 100 fëmijë.
Ky aktivitet kishte për qëllim afrimin e sportit, në veçanti volejbollit, me fëmijët e moshës së hershme, duke krijuar ambient argëtues, edukativ dhe sportiv.
I pranishëm në këtë ngjarje ishte edhe kryetari i Komunës së Vitisë z. Sokol Haliti, i cili përshëndeti iniciativën dhe përkushtimin institucional për promovimin e sportit tek gjeneratat e reja.
Aktiviteti u koordinua nga Zanfine Xhemajli nga Federata e Volejbollit të Kosovës, ndërsa është pjesë e programit “Sport në Shkolla”, që zbatohet me përkrahje nga Ministria e Kulturës, Rinisë dhe Sportit, në partneritet mes Federatës së Sportit Shkollor të Kosovës dhe federatave të volejbollit, basketbollit, hendbollit, shahut dhe atletikës.