Ish-kryetari i Kuvendit të Kosovës dhe njëri nga ish-drejtuesit e UÇK-së, Jakup Krasniqi, ka mbërritur sot në Kosovë, në një vizitë familjare të miratuar nga Dhomat e Specializuara të Kosovës në Hagë.
Sipas burimeve të KosovaPress-it, ardhja e tij lidhet me gjendjen shëndetësore të bashkëshortes, e cila është e sëmurë. Klan Kosova raporton se Krasniqi ndodhet në shtëpinë e tij në lagjen Velania të Prishtinës, për shkak të përkeqësimit të gjendjes shëndetësore të bashkëshortes, Sevdijes. Sipas televizionit, ai pritet të qëndrojë në shtëpi deri rreth orës 17:00, pra mbi gjashtë orë.
Lajmin se Krasniqi është nisur nga Haga e kishte konfirmuar paraprakisht për televizionin Dukagjini edhe Nasim Haradinaj, i cili tha se ai po vjen në Kosovë për çështje familjare. Ekipet e EULEX-it dhe të Policisë së Kosovës ishin vendosur pranë shtëpisë së tij para mbërritjes.
Specialja: Vizitë nën mbikëqyrje, e 15-ta e këtij lloji
Dhomat e Specializuara kanë konfirmuar se, për arsye bindëse humanitare, Trupi Gjykues ka udhëzuar Sekretarinë që ta organizojë këtë vizitë nën mbikëqyrje në Kosovë. Krasniqi mbetet në paraburgim dhe nën kujdestarinë e gjykatës gjatë gjithë kohës.
Zëdhënësi i Speciales, Michael Doyle, deklaroi për Gazetën Express se kjo është vizita e 15-të e një të paraburgosuri në Kosovë që e kanë autorizuar gjyqtarët e Dhomave për arsye humanitare. Vizita të tilla lejohen me Rregullën 56 të Rregullores së Procedurës dhe Provave, e cila bazohet në të drejtën ndërkombëtare për të drejtat e njeriut.
Hera e dytë që nga transferimi në Hagë
Kjo është hera e dytë që Krasniqi vjen në Kosovë që nga nëntori i vitit 2020, kur u arrestua në Prishtinë dhe u dërgua në qendrën e paraburgimit në Hagë. Herën e parë, në tetor 2024, ai u lejua të vinte në vendlindje pas vdekjes së vëllait të tij. Edhe atëherë Specialja e arsyetoi vendimin me arsye humanitare, ndërsa vizita u realizua me mbështetjen e EULEX-it dhe të Policisë së Kosovës.
Kërkesat e tij për lirim të përkohshëm janë refuzuar disa herë. Në korrik 2023 gjykata nuk e lejoi të kalonte dy javë me familjen. Në rishikimin e korrikut 2026, Trupi Gjykues urdhëroi vazhdimin e paraburgimit dhe vlerësoi se rreziqet për pengimin e procedurave vazhdojnë të ekzistojnë.
I dënuar me 25 vjet, aktgjykimi nuk është i formës së prerë
Më 16 shtator 2026, Trupi Gjykues i Dhomave të Specializuara shpalli fajtorë për krime lufte Jakup Krasniqin, Hashim Thaçin, Kadri Veselin dhe Rexhep Selimin. Krasniqi dhe Thaçi u dënuan me nga 25 vjet burgim, Veseli me 18 vjet dhe Selimi me 13 vjet. Atyre do t'u llogaritet koha e kaluar në paraburgim. Prokuroria kishte kërkuar nga 45 vjet burgim për secilin, ndërsa gjykata rrëzoi akuzat për krime kundër njerëzimit.
Të katërt e kanë mohuar fajësinë gjatë gjithë procesit. Aktgjykimi nuk është i formës së prerë dhe mund të kundërshtohet në apel.
Krasniqi, i lindur më 1951 në Negroc të Drenasit, ishte zëdhënës i UÇK-së gjatë luftës. Më vonë ishte kryetar i Kuvendit të Kosovës në kohën e shpalljes së pavarësisë dhe dy herë ushtrues i detyrës së presidentit.