Ditën e sotme, Bekë Berisha i cili ditë më parë mori postin e kryetarit te KB Prishtina, pasi sipas ligjit nuk ka të drejtë të shfrytëzoj dy poste publike, sot e emëroi si ushtrues detyre të Kryetarit të klubit, Rinor Grajqevcin.
Grajqevci i cili është edhe kryetar i tifo grupit ”Plisat” do të jetë U.D Kryetar i KB Prishtinës, deri në zgjendjen e kryetarit të ri.
“Plisat” kohët e fundit si shenjë proteste ndaj kryesisë së vjetër të klubit, kanë bojkotuar ndeshjet e Prishtinës, derisa tashmë kanë bërë thirrje qytetarëve, që në ndeshjen e nesërme ndaj Vëllaznimit në çerekfinalen e Kupës së Kosovës, të mbushin palestrën.
Ftesë për kthim në sallë, qytetarë të Prishtinës, e dimë pse shumë prej jush nuk keni ardhur në sallë vitet e fundit.
Padrejtësitë, keqmenaxhimi dhe ndarjet e larguan qytetin nga klubi.
Sot, kjo ka ndryshuar.
Ne, Plisat, e kemi fituar betejën për klubin.
Basketbolli i Prishtinës po kthehet te qyteti dhe te njerëzit e vet. Për ta kthyer aty ku duhet klubin na duhet shumë punë. Do ta bëjmë së bashku me ju.
Prandaj, kjo është një ftesë e hapur: Për ata që u larguan nga padrejtësia.
Për ata që u lodhën nga ndarjet.
Për ata që ende e duan Prishtinën, edhe në heshtje.
Ejani në sallë.
Ta mbushim bashkë.
Ta rikthejmë atmosferën që na ka munguar.
Prishtina është e jona. E juaja. E secilit prej nesh që e duam qytetin, klubin e vendin – pa hile.
Salla është e jona. Klubi është i joni. Qyteti është i joni.
Koha është tani. Për Prishtinën”, reagojnë “Plisat”.
