Egnatia ndez me të parën, kalon lehtësisht Apoloninë

Futboll

Egnatia ndez me të parën, kalon lehtësisht Apoloninë

Më: 28 nëntor 2022 Në ora: 18:35
Egnatia

Egnatia ka kaluar të shtunën me sukses testin e parë miqësor të kësaj ndalese për shkak të Botërorit. Rrogozhinasit kanë mposhtur pa shumë vështirësi me shifrat 0-3 Apoloninë në stadiumin “Loni Papuçiu” të Fierit.

Gjithçka është zgjidhur shpejt dhe lehtë nga rrogozhinasit, të cilët shënuan një gol në pjesën e parë dhe dy gola në pjesën e dytë. Djemtë e Shpëtim Duros ishin dominues gjatë gjithë lojës dhe për asnjë moment nuk e diskutuan fitoren. Nga ana tjetër Apolonia nuk po del dot nga kriza e thellë e rezultateve negative.

NDESHJA – Takimi ka nisur vrullshëm nga ana e rrogozhinasve, të cilët rastin e parë të rrezikshëm e patën në minutën e 8-të. Mesfushori Fernando driblon këdo që i del përpara dhe në fund lëshon një silurë të vërtetë me të majtën, që “qeth” traversën. Në minutën e 22-të Egnatia gjen rrjetën. Aksioni nis nga këmbët e Mustës, që kroson bukur në zonë, aty ku mbrojtësi Repaj tregohet i pakujdesshëm dhe e prek topin me dorë. Kryesori Cjapi akordon penallti dhe Camaj nuk gabon.

Pas dhjetë minutash, Apolonia do të bënte gjuajtjen e parë në portë me Gjatën, që gjuan fort me të djathtën brenda zonës, por portieri Sherri është i vëmendshëm. Të dytën rrogozhinasit e nisën aty ku e lanë, duke dominuar dhe krijuar raste. Golin e dytë e gjejnë vetëm në minutën e 65-të. Mesfushori Zejnullai bën gjithçka mirë në krahun e djathtë, më pas futet në qendër dhe godet me të majtën, duke dërguar sferën në trekëndëshin e portierit Bushi dhe dyfishuar shifrat.

Apolonia është thuajse inekzistente në fushën e lojës, pa nerv e dëshirë për të fituar. Pavarësisht se është vetëm një ndeshje miqësore, kjo ecuri e deritanishme vërteton gjendjen e vështirë në të cilën ndodhet skuadra fierake. Në të 81-ën Mëllugja harkon një top të gjatë për mbrojtësin Lila, i cili kontrollon topin, “i vërsulet” portës dhe lëshon një gjuajtje me të djathtën duke fiksuar shifrat 0-3. Egnatia është perfekte, dominuese dhe tejet e vështirë për Apoloninë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat