Kampionati i Kategorisë së Parë cilësohet profesionist me të njëjtën vlerë sa Kategoria Superiore sipas vlerësimeve që i bën FIFA kampionateve të ndryshme.
E megjithatë, kjo kategori e futbollit profesionist shqiptar ka telashe të vazhdueshme edhe për gjërat më themelore.
Në javën e parë, fillimi i ndeshjes së Ilirisë më Pogradecin u shty për disa minuta pasi në stadiumin “Redi Maloku” në Fushë Krujë mungonte një zjarrfikëse, pasi ishte e impenjuar me fikjen e zjarreve në malin e Krujës dhe u prit derisa të vinte një e tillë dhe të vihej në dispozicion për zhvillimin e ndeshjes në stadium.
Sot, radhën e kishte stadiumi i Orikut, ku luhej ndeshja mes vendasve dhe Bylisit.
Këtë radhë, ndeshja u vonua për më shumë se 30 minuta në startin e saj, pasi në impiant mungonte ambulanca. U desh që të nisej një e tillë nga qyteti i Vlorës për t’u vënë në dispozicion në stadium që takimi të fillonte.