Stoev: Bullgaria pret garanci të qarta nga Maqedonia e Veriut

Maqedonia

Stoev: Bullgaria pret garanci të qarta nga Maqedonia e Veriut

Më: 30 nëntor 2021 Në ora: 18:59
Svetllan Stoev

Sofja pret garanci të qarta nga Shkupi lidhur me të drejtat e qytetarëve me ndjenjë përkatësie bullgare dhe përmbushjen e Marrëveshjes për miqësi nga viti 2017, theksoi shefi i diplomacisë bullgare Svetllan Stoev në takimet bilaterale me eurokomisarin për Fqinjësi dhe Zgjerim, Oliver Varheji dhe me ministrin spanjoll të Punëve të Jashtme, BE-së dhe Bashkëpunimit, Hoze Manuel Albaez Bueno.

Siç njofton BGNES, takimet, në të cilat është folur për perspektivat për fillimin e negociatave të Maqedonisë së Veriut për anëtarësim në BE janë mbajtur në Barcelonë në kuadër të Forumit rajonal të gjashtë të Unionit të Mesdheut dhe takimit ministror të BE-së dhe vendeve partnere të fqinjësisë jugore.

“Pala bullgare i theksoi angazhimet e veta proaktive muajve të fundit për zgjidhjen e çështjeve të hapura me Shkupin, me qëllim që të garantohen të drejtat e qytetarëve me identitet bullgar dhe zbatimin e Marrëveshjes për miqësi, fqinjësi të mirë dhe bashkëpunim nga viti 2017. Presim garanci të qarta nga Republika e Maqedonisë së Veriut për këtë”, kumtoi MPJ bullgare.

Stoev sot dhe nesër qëndron në Rigë ku merr pjesë në takimin e ministrave të Punëve të Jashtme të vendeve anëtare të NATO-s, në të cilin merr pjesë edhe shefi i diplomacisë Bujar Osmani.

Në kuadër të takimit ministror të NATO-s, siç kumtoi MPJ bullgare, do të mbahet edhe takimi me përfaqësuesin e lartë të BE-së për Politikë të Jashtme dhe të Sigurisë, Zhosep Borell dhe partnerët Suedia dhe Finlanda për ngjarjet aktuale në Ballkanin Perëndimor.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat