Ide e artë, novatore, unike - një liqen në Prishtinë

Opinione

Ide e artë, novatore, unike - një liqen në Prishtinë

Idriz Zeqiraj Nga Idriz Zeqiraj Më 25 tetor 2021 Në ora: 21:23
Përparim Rama

Së fundi, arkitekti i përbotshëm, Përparim Rama, shpërfaqi idenë e artë, novatore, unike, për një liqen në kryeqendrën e Kosovës. Ai përcaktoi edhe lokacionin, vendin dhe burimet ujore, që do ta furnizonin atë. Zhvendosja e stadiumit nuk përbën asnjë problem, vështirësi. Lokacioni për bërjen e stadiumit sportiv, është lehtësisht i realizueshëm, në periferi të qytetit. Beton e blloqe të bollshëm.

Një liqen në Mitrovicë, siç thotë kryetari i deritashëm, Agim Bahtiri, frekuentohet nga 20 mijë qytetarë në ditë. Atëherë, numri i vizitorëve në liqenin e Prishtinës do të ishte më masiv. Prishtina e ngulfatur, nga ndërtime të rrëmujshme, në mungesë të plotë të hapësirave gjelbëruese, është përvëluese përgjatë stinës me vapë. Një liqen brenda qytetit, do ta zbuste vapën e sikletshme.

Për reagimin profan, sikur do të bëhej nami, për të keq, me zhvendosjen e lokacionit të stadiumit futbollistik, na kujton urtësinë popullore: "Çka dinë dhija, çka është taxhija?!" Edhe mendimi se kjo mund të bëhet, jo tani, por në perspektivë, është simplist, dilitantesk dhe hiç i qëndrueshëm. Përkundrazi, edhe sikur të fillonte edhe një muaj më vonë, do të konsiderohej bjerrje e kohës.

Pa mëdyshje, kjo do të ishte një ide e artë, një veprim sa i mençur, aq edhe i nevojshëm, për një kryeqytet me rritje rapide, gjeometrike. Zërat provincialë, që rastësia u ka dhënë mundësinë të dëgjohen, e kanë të vështirë ta kuptojnë njeriun krijues, i pendës dhe i mendjes, siç është Përparim Rama. "Dardha pikë nën dardhë",- siç thotë populli. Në vitet `60-a, e kam njohur Ramush Ramën, gjyshin e Përparimit, atëbotë, kryetar komune në Podujevë. Ishe kryetar i vyeshëm, që bëri emër për të mirë. Ka një emërues të përbashkët: Kërkesa për ndryshim, pas Plenumit të Brioneve. Dhe, gjithnjë bëhej fjalë për progres e dinjitet.

Kam përcjellë vëmendshëm shpalosjen e programeve zhvillimore, të kandidatëve për kryetarë të komunave. Edhe opinioni i ka dëgjuar me shumë kënaqësi, por, edhe me skepticizëm logjik, duke i konsideruar disa makro-premtime "fontanë dëshirash", pra, pa mundësi të realizimit. Ndërkohë që, disa nga pretendentët për kryetar komune, në debatet e përsëritura, kanë qenë mbresëlënës, madje, edhe bindës.

Shumica e kandidatëve, për të parë komunash, kanë qenë modestë dhe kanë folur në shumës: "Ne kemi program gjithëpërfshirës; programi ynë është punuar nga grupe profesionale përkatëse" e tjera. Ka pasur pak kryetar pretendues dhe asambleistë në pritje, të cilët janë ankuar se u janë vjedhur programet, nga kolegët e tyre të partive tjera. Mendoj se kjo akuzë është tërësisht e pa vend, edhe sikur të jetë e vërtetë.

Përkundër, ata duhet të krenohen dhe t`i stimulojnë "plagjiatorët" e tyre, që në rastin konkret janë pozitivë, sepse duan ta prosperojnë, përparojnë e begatojnë komunën, me programe të mira, duke i shërbyer komunitetit, popullit me punë të mira. Kjo lloj plagjiature ndryshon tërësisht nga temat studimore, teorike, që dembelosin, parazitojnë njerëzit dhe përfitojnë e lavdërohen me djersën e tjetrit, pa prodhuar të mira materiale për të tjerët.

Por, kam dëgjuar edhe kandidat për kryetar komune, i cili, modestisht e botërisht, është deklaruar se "unë kam program të përkryer për arsimin, të bërë nga një specialist i arsimit", i cili nuk i përket subjektit të tij partiak. Dhe, kjo duhet konsideruar si vlerë e kandidatit, i cili është i përkushtuar të bëjë punë të mira. Sepse, një kryetar, qoftë ai edhe intelektual kalibri, nuk mund ta zotërojë të gjithë gamën e njohurive, që i nevojitën një komune, përgjat një apo më shumë mandatësh.

T`i kthehem sërishmi idesë ideale, të virgjër të kandidatit për kryetar të Prishtinës, Përparim Rama: Stadiumi sportitv aktual të bëhet liqen i ardhshëm i Prishtinës. Gjërat e zakonshme, janë lehtësisht të zbulueshme. Por, një projekt, i ideuar nga arkitekti i përbotshëm, Përparim Rama, duhet të merret seriozisht, të diskutohet dhe të aprovohet për realizim, pavarësisht se kush do ta gëzojë postin e kryetarit të komunës të Prishtinës. Përcjellja e projektit, nga arkitekti Rama, veç sa do ta ndihmonte kryetarin Vitia, në realizimin e një vepre madhore, krye të rëndësishme dhe të nevojshme, përjetësisht, për brezat prishtinas dhe, pse jo, edhe të Kosovës tonë.

Bashkëpunimi dhe studimi i programeve zhvillimore, të kandidatëve për kryetarë, në nivel komunal, do ta ndihmonte kryetarin e zgjedhur, për ta begatuar programin personal dhe zgjerimin me projektet e kolegëve në garë. Kjo vlen edhe për kryetarët fitues në shkallë Republike. Një urtësi dibrane porositë: "Një mendje- asnjë mendje; dy mendje - gjysmë mendje; tri mendje - një mendje!"

Urojmë për mirëkuptim dhe pa hatërim!

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat