Mos udhëtoni nëpër Serbi

Opinione

Mos udhëtoni nëpër Serbi

Nga: Faton Mehmeti Më: 17 gusht 2025 Në ora: 16:47
Autori Faton Mehmeti

Arrestimet e fundit të shqiptarëve në Serbi nuk janë ngjarje të izoluara, por pjesë e një politike të qëllimshme të shtetit serb kundër qytetarëve tanë. Përmes këtyre veprimeve, Beogradi po përpiqet të mbajë gjallë frikën, të dërgojë mesazhe politike dhe të përdorë shqiptarët si kartë në lojërat e tij nacionaliste.

Shumë qytetarë që udhëtojnë në Serbi përballen me maltretime, ndalesa të gjata, pyetje provokuese, ndërsa jo rrallë edhe me arrestime të pabaza. Pretekstet janë gjithmonë të ngjashme: “dyshime për terrorizëm”, “rrezik për sigurinë publike” apo akuza të sajuara. Në fakt, e gjithë kjo është pjesë e strategjisë për të ushtruar presion dhe për të shfaqur forcë ndaj shqiptarëve.

Në këto rrethana, udhëtimet në Serbi përbëjnë rrezik real. Askush nuk ka garanci se një qytetar i zakonshëm që kalon kufirin për arsye pune, tregtie apo vizite familjare, nuk do të përfundojë viktimë e padrejtësive dhe manipulimeve politike. Ky është një rrezik i panevojshëm dhe i papranueshëm.

Prandaj, mesazhi është i qartë: mos udhëtoni në Serbi. Siguria dhe dinjiteti i qytetarëve tanë janë mbi çdo interes tjetër. Alternativa ka, qoftë përmes vendeve fqinje, qoftë me rrugë të tjera më të sigurta. Nuk ka arsye të rrezikohet jeta apo liria për të kaluar në një shtet që hapur e trajton shqiptarët si armiq.

Kjo nuk është vetëm thirrje për individët, por edhe apel për institucionet tona. Qeveria duhet të reagojë fuqishëm, të ngrejë çështjen në nivel ndërkombëtar dhe të mbrojë qytetarët e saj. Heshtja dhe mosveprimi vetëm sa e inkurajojnë Serbinë të vazhdojë me praktikat e saj diskriminuese.

Sot, më shumë se kurrë, duhet të jemi të bashkuar dhe të vetëdijshëm: siguria e shqiptarëve nuk ka çmim. Mos udhëtoni në Serbi.

comment Për komente lëvizni më poshtë
Sot mund të lexoni Shfletoni kopertinat