Ashtu sikurse deri dje edhe sot u vërtetua fakti që komplet politika e Kosovës (pozitë e opozitë) është plotësisht e kapur nga mafia energjetike. Prandaj, heshtin para mafisë energjetike.
Pengesat e vazhdueshme mbi 20 vjeçare nga rusët-evropianët-serbët-turqit për mospavarësimin energjetik të Kosovës përbëjnë majën e sabotazhit kundër të ardhmes së Kosovës. Këto pengesa u bënë në emër të ca standardeve të shpifura dhe ne e hëngrëm karremin.
Një shtet pa energji s’ka të ardhme. Luftërat në Ukrainë, Lindje të Mesme dhe shumëku në glob po bëhen vetëm për energji, ndërkohë që ne as e deshëm energjinë tonë, as atë amerikane, por zgjodhëm mjerisht energjinë serbe që na ka hyrë si kancer nga brenda.
Goditja e bizneseve që filloi intensivisht nga dje do ta përshpejtojë shpopullimin e Kosovës. Mbani mend: Shumica do të bëhemi diasporë e një pakicë vendorë. Ky ka qenë misioni dhe qëllimi historik i Serbisë, Rusisë, shumë evropianëve dhe Turqisë: që trojet shqiptare të zbrazen sa më shumë nga shqiptarët. Kjo ëndërr po realizohet.
S’e kam thënë rastësisht që dimri që po vjen do të jetë “Dimri i vetmisë së madhe”, sepse krahas izolimit dhe sanksioneve perëndimore, shkatërrimit të rendit kushtetues që po ndodh, mafia energjetike do ta përshpejtojë shkatërrimin edhe atë të asaj pak ekonomie që mezi e kemi ndërtuar në këto 26 vite çlirim. Ende asgjë s’keni parë. Koha për një zgjim të madh sot, sa s’është bërë vonë nesër. Dita e mirë shihet në mëngjes. Qofsha i gabuar! A.H.