- Sonte s’kam editorial.
Shkruani vetë.
Ju pashë që po dini të shani, madje më shumë se ç’kam parë ndonjëherë, edhe në kronikat e Mesjetës.
- Nesër, megjithatë, do t’ju tregoj një sekret të profesionit:
Lexuesi shqiptar, përveç që të kërkon shkrime të bukura (të informosh, të guxosh, të digjesh, të rrezikosh, ta bësh të qeshë e të qajë),
të kërkon edhe bukuri fizike.
Pra: talent + fustan të ngushtë.
Ndërsa vetes nuk i kërkon asnjërën.
- Dhe, sa për ta ditur: kohëve të fundit janë shtuar edhe presionet e grave në rrugë.
Të ndalin, të matin, të gjykojnë, me zë të lartë të japin nota sikur jam ndonjë provim i hapur i Fakultetit të Pamjes.
- Unë nuk e di çka i tremb shtrigat… por e di që mua më duhet një kapuç.
Shembulli i sotëm:
- Në sheshin “Nënë Tereza”, një grua me një burrë paksa të pashëm.
Burri (me entuziazëm estetik):
“E bukur!”
Gruaja, me mantelin kaki të koleksionit “Lufta e Dytë Botërore (fronti i dimrit)”:
“Jo bre, çfarë!”
Burri këmbëngul:
“Jo valla, e bukur!”
- A e kuptuat dramën?
Gruaja vetes i fal çdo gjynah estetik.
Autorja, ndërkohë, duhet të jetë njëkohësisht:
Miss Universe, Edith Durham, Nora e Kelmendit, Barbie, Shota e Azemit, dhe Miss-i i Ahmet Delisë... dhe pak Sylvia Plath, që të durohet gjithë ky presion pa e djegur shtëpinë.
- Shtrigat e përditshme e ndjekin autoren jo për tekstin…
por për të parë a i ka fryrë buzët.
- S’di a ka ndodhur ndonjëherë në historinë e njerëzimit që një grua që s’din të shkruajë, t’i kërkojë autores që shkruan… të duket bukur.
- Unë pres kritikë letrare, gjej kritikë trupore.
- Nesër, vazhdojmë temën.
Do t’ju tregoj si, edhe kur shkruan një editorial që tund qeveri, popull, ambasadorë, opozitë dhe perandori,
prapë, nana të thotë:
“Mos m’rri n’tlina se po më vjen inat me ardh kush e me t’pa!”
Duhet të jesh Miss Universi i Letërsisë.
- Është popull lookist.
Nusja: e kish një hundë të madhe, sy në gropë, flokë të rralla, një prapanicë përtoke…
por shtrigat autoren e studiojnë sikur po i bëjnë ekspertizë estetike;
a e shtrëngon belin dhe pse s’ka qenë sot si kukull…
Atyre nuk u pengon të shkruash bukur...u pengon të dukesh bukur.
- Këngëtari çorod u gjen behane bukurosheve:
“Ti n’atë kodër, unë n’atë kodër… boll e mirë, veç pak e vogël.”
- Dhembja estetike është ai pasioni që po djeg shqiptarët.
E tema kryesore e femrave është pamja!
P.S.
Romanin, po, ka shumë gjasa ta shkruaj anglisht.
Për protestë.
Se aty ku burri është i poshtër, gruaja është e ligë, thoshte Zaratustra.
Oj shtriga!
