Dikush po buzëqeshte gabim

Opinione

Dikush po buzëqeshte gabim

Nga: Kimete Berisha Më: 16 maj 2026 Në ora: 17:48
Kimete Berisha

…

VV - 116

116 nuk duket si numër.

Duket si kod alarmi shtetëror:

“largohuni anash,

kemi ardhur ta shpëtojmë Republikën.”

VV hyn në zgjedhje

sikur hyn inspektori në autobus:

me dyshim,

me nerva,

dhe me bindjen

se dikush po vjedh bileta.

Ka energjinë:

“kemi ardhur ta rregullojmë këtë vend,

edhe nëse duhet ta prishim fillimisht.”

Ambicie.

Vetëbesim.

Kokëfortësi.

Emocion i fshehur.

Dhe,

paranojë.

Pra:

Kurti flet si robot,

por zemërohet si poet.

Rreziku:

beson

se fati i shtetit

varet vetëm prej tij.

…

PDK - 125

125 është numër

që e njeh kamerierin,

drejtorin,

doganierin,

edhe kushëririn e doganierit.

Allababulla.

Ka energjinë:

“relaksohu.

Shteti është rrjet.”

Partia nuk shqetësohet nga skandalet.

Vetëm pyet:

“Kush e nxori skandalin?”

125 është numër kazinoje politike.

Numri i njerëzve

që gjithmonë e njohin dikë.

Kjo parti nuk frikësohet.

E kaluara e mbron.

Rreziku:

nuk del më prej saj.

…

LDK - 113

113 është numri

i njerëzve

që mund të bëjnë krizë politike

me ton të edukuar.

Ka energjinë:

“jemi shumë të zhgënjyer.”

Duket si numër

që para çdo vendimi

kërkon edhe një mbledhje.

Edhe një analizë.

Edhe një kafe.

Profesora

që edhe kur grinden,

duket sikur po mbajnë ligjëratë.

Dy njësha:

dy kryetarë imagjinarë:

“Jemi racionalë,

por askush s’e di kush e mori vendimin.”

Derisa u kthye Vjosa,

si kujdestare klase

me thupër lart,

duke bërtitur:

“We don’t need no education.”

Dhe papritur,

u dha urdhri

se nuk mund ta haje pudingun

pa e ngrënë mishin më parë.

“You!

Yes!

You, behind the bike sheds!

Stand still, laddie!”

Dhe,

për çudi,

e ngjalli klasën.

Rreziku:

nuk dua të tregoj.

…

AAK - 128

128 sillet

sikur zgjedhjet

janë finale boksi.

Ka energjinë:

“mos na prekni në nder.”

Kjo parti nuk hyn në debat.

Hyn në betejë.

Edhe kur flasin për buxhetin,

duket sikur po çlirojnë territor.

AAK hyn në zgjedhje

si soundtrack filmi aksion.

Dhe sillet

sikur çdo ditë

është viti 1999.

Ka atë energjinë:

“mos na testoni karakterin,

mos më prek n'tel.”

Nuk e do diplomacinë.

E do fjalën:

burrninë.

Luftëtari

që ende mendon

se politika është çështje nderi.

AAK:

ose hyn në betejë,

ose në odë.

Mes nuk ka.

Rreziku:

trimëria më e madhe se strategjia.

…

PSD - 129

129 është numri

i atyre

që hyjnë në politikë

vetëm për ta bërë atmosferën të çuditshme.

Edhe:

“po sikur problemi të jetë vetë realiteti?”

Kjo parti nuk kërkon pushtet.

Kërkon mikrofon.

Hyn në debat

jo për të fituar,

por për ta bërë tjetrin nervoz.

Pi kafe,

lexon portalet për veten,

se çka ka thënë mbrëmë në studio televizive,

dhe pastaj shkon në panel

për ta rrëzuar konceptin e shtetit.

Ka energjinë:

“ne humbim zgjedhjet,

por ju prishim rehatinë mendore.”

Ka edhe një kaos filozofik brenda:

hyjnë në politikë

për ta shpjeguar jetën.

Rreziku:

pseudo-ironia deri në vetëshkatërrim.

…

EPILOG

S’ka.

Për momentin.

…

P.S.

Jago.

Othello.

Desdemona.

Kush

është.

Kush.

…

AUTOKRITIKË

Ti nuk del në zgjedhje

derisa të bindesh

se kush kë e ka “tradhtuar”:

Kurti - Osmanin,

apo anasjelltas.

Osmani po ankohet -

Kurti po hesht.

Heshtja është aprovim.

Dhe:

deri tani po duket

se Kurti - Osmanin…

dhe kjo fare-fare s’të pëlqen.

Sepse,

ke vërejtur,

se sapo dyshojnë

në besnikërinë tënde absolute,

“këta” të gjuajnë…

…kujtojnë se të gjuajnë.

Për shembull:

ti i voton,

lobon për ta,

shkruan mirë për ta,

i mbron,

sepse beson.

E ata:

“Po, Kimi

ka shkruar shumë mirë për mua…

edhe më ka votuar…

ama

më thanë se diku,

në një farë vendi,

kish pas folur keq për mua.”

Politikë që merret me thashetheme.

Pra:

VV nuk kërkon mbështetje.

Kërkon besnikëri absolute.

Po mirë.

Hajde merre…

Na.

comment Për komente lëvizni më poshtë
Sot mund të lexoni Shfletoni kopertinat