Aksidentoi dhe e braktisi 21-vjeçaren greke në qendër të Selanikut. Në kërkim, shqiptari 33-vjeçar

Diaspora

Aksidentoi dhe e braktisi 21-vjeçaren greke në qendër të Selanikut. Në kërkim, shqiptari 33-vjeçar

Më: 24 nëntor 2022 Në ora: 08:40
Foto ilustrim

Policia dhe media greke ditën e djeshme kanë bërë me dije se janë vënë në kërkim të një të riu shqiptar për shkak se është larguar nga vendi i aksidentit, ku ka plagosur rëndë një të re greke.

Ngjarja ka ndodhur pak pas mesnatës së të hënës në zonën e Selanikut, ndërkohë që shqiptari po lëvizte me mjetin e një mikut të tij grek. Kanë qenë banorë të zonës, të cilët kanë mundur të ndjekin shqiptarin nga pas dhe të marrin targën që i kanë dhënë edhe Policisë. Mediat greke bënë me dije se një 33-vjeçar shqiptar është shpallur në kërkim nga policia greke pasi ka aksidentuar një 21-vjeçare greke me makinë.

Gjithçka ndodhi pak pas orës 01:00 të së martës. Makina gri e errët, që drejtohej prej tij dhe ia kishte huazuar mikut të tij, 44- vjeçari përplasi të renë në qendër të Selanikut.

Qytetarët që dëgjuan zhurmën dolën me shpejtësi në rrugë për të parë se çfarë ndodhi, i bërtitën shoferit të ndalonte dhe një prej tyre ndoqi makinën me një motoçikletë, e cila arriti të zhdukej në rrugët e ngushta të zonës.

Në fakt, drejtuesi i mjetit në tentativë për t’u larguar nga vendi i ngjarjes është kthyer mbrapsht dhe ka goditur sërish 21-vjeçaren e plagosur rëndë në asfalt.

Vajza fatkeqe vazhdon të luftojë për jetën, pasi ndodhet e shtruar në gjendje shumë kritike dhe e intubuar në Repartin e Mjekimit Intensiv të Spitalit “Papageorgiou” në Selanik. Ajo iu nënshtrua një sërë operacionesh, por sipas mediave greke ka dëmtime të mëdha në kokë. Makina që përplasi 21- vjeçaren u gjet mëngjesin e së martës e braktisur, pa targa, me xham të thyer dhe të çarë në njërën anë, në Unazën e Selanikut.

Fillimisht, Policia ndaloi pronarin e makinës, 44-vjeçarin, pasi banorët kishin mundur të merrnin targën e mjetit. Por, ai rrëfeu në polici se nuk ishte ai në timon dhe se makinën ia kishte dhënë hua mikut shqiptar. Policia greke po punon për kapjen e tij.

Mësohet se ai është një person i njohur për Policinë, i proceduar disa herë për drogë në vendin e tyre. Ata kanë shpërndarë foton e tij, por ende nuk kanë nxjerrë emrin, ndërkohë që nuk dihet nëse kanë kërkuar bashkëpunimin e Policisë sonë, pasi shqiptari mund të ketë hyrë brenda kufijve.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat