Detaje të reja kanë dalë në dritë rreth vrasjes së shqiptarit Armend Xhika në Britani ku i dyshuari kryesor për vrasjen më 13 maj 2021, ka mohuar akuzat.
I dyshuari Mentor Selmani, 28 vjeç, pranoi se kishte pasur një thikë gjatë një përleshjeje të dhunshme në Burngreave, Sheffield, ku mbeti i vrarë 22-vjeçari.
Por, këmbënguli se e kishte marrë armën vetëm për të “frikësuar” njerëzit që po debatonin me shokun e tij Eljaso Cela dhe nuk goditi askënd.
Mentor Selmani, Marsid Senia dhe Mardov Dushku janë në gjyq për vrasjen e Xhikës në Sheffield Crown Court.
Ata akuzohen gjithashtu për plagosjen e rëndë të tre miqve të Xhikës gjatë një konfrontimi mes dy grupeve të shqiptarëve në Earl Marshal Road.
Prokurorët thonë se Cela dhe vëllai i tij Mateo gjithashtu morën pjesë në aktin vdekjeprurëse, por ata nuk janë në gjyq pasi janë në arrati.
Cela dhe Xhika organizuan të takoheshin në Burngreave për të zgjidhur një mosmarrëveshje në lidhje me një ngjarje ku ata ishin përfshirë në Rotherham më parë.
Selmani i tha gjykatësit se nuk kishte qenë në dijeni të përplasjes apo ndonjë mosmarrëveshjeje kur u nis me makinë në Earl Marshal Road me qëllimin për të takuar Eljaso Celan.
I pandehuri mbërriti në rrugë me Mateo Celën rreth orës 19:00. Selmani, i cili ishte shpërngulur në Sheffield nga Londra rreth pesë javë para ngjarjes, tha se doli nga furgoni për të pirë një cigare dhe pa Eljason dhe Senian matanë rrugës duke folur me një grup burrash që ai nuk i njihte.
Pasi kaloi rrugën për të dëgjuar më mirë ai ndjeu se “atmosfera nuk ishte miqësore”, kështu që u kthye në furgon për të marrë diçka për të mbrojtur veten nëse ishte nevoja.
Selmani tha në gjykatë se pa një thikë në derën e pasagjerit të furgonit dhe e futi në xhep. Ai pranoi se ishte “marrëzi”, por tha se në atë kohë ai ishte i shqetësuar për miqtë e tij të cilët ishin “të rrethuar nga njerëz që nuk i njihja”. “Po mendoja se do të përpiqesha t’i ndaja dy palët dhe t’i frikësoja që të largoheshin të tjerët”, shtoi ai.
Pamjet e CCTV-së në gjykatë tregonin Selmanin duke vrapuar me thikë kur shpërtheu dhuna teksa Eljaso Cela u hodh drejt Xhikës. I pandehuri pranoi se Cela filloi dhunën, por tha se ai nuk e kishte parë këtë në atë kohë dhe i ishte përgjigjur një prej grupit të Xhikës, Fatson Dushkut, duke goditur më pas mikun e tij.
Videoja tregonte Selmanin duke i ngulur thikën një anëtari tjetër të grupit të Xhikës, Mikael Kanachit.
I pyetur nëse kishte goditur me thikë dikë, ai tha: “Absolutisht jo”.
Armando Xhika u plagos rëndë atë natë dhe vdiq në spital.
