Besa Famgas është kampione e Kosovës në hendboll në konkurrencën e juniorëve.
Pasi seniorët fituan titullin dhe Kupën, edhe ekipi junior i Besës fitoi titullin e kampionit, duke dëshmuar se klubi pejan i kushton rëndësi edhe të ardhmes.
Besa të dielën e mposhti në finale skuadrën e Prishtinës. Ndeshja në kryeqytet përfundoi me rezultatin 26:21 në të mirë të ekipit pejan. Pas pjesës së parë rezultati ishte 14:10 për Besa Famgas.
Edonis Hajra dhe Olsi Mulaj i shënuan nga gjashtë gola për Besën. Pesë i realizoi Jon Vokshi.
Te Prishtina, Erdon Jahiu i shënoi tetë gola.
Nga katër i kishin Hekuran Ramadani e Art Ibrahimi. Edhe Prishtina ka një gjeneratë prej të cilës pritet shumë në të ardhmen.
