Dyshime për tenderë të kurdisur në Komunën e Kërçovës! Në Komisioni për Parandalimin të Korrupsionit është paraqitur një kompani e cila kishte aplikuar për trajtimin e qenve endacak, e cili ka kundërshtuar procedurën e tenderimit, për shkak siç ka pohuar, oferta e tij ka qenë me çmim më të ulët, ndërsa Komuna ka përzgjedhur kompaninë që ka ofruar çmim më të lartë për trajtimin e qenve endacak.
Rastin e konfirmoi edhe anëtari i Antikorrupsionit, Nuri Bjarami, cili tha se pasi të përfundojë lënda do të komunikojmë publikisht.
“Lidhur me tenderimin për përkujdesje dhe trajtimin e qenve endacak ka paraqitje tek Komisioni Shtetëror për Parandalimin e Korrupsionit nga njëri prej aplikuesve në tenderimin publik dhe procedura është në rrjedhë e sipër, është kah fundi dhe kur komisioni ta përmbyllë shqyrtimin dhe analizën e të gjitha informacioneve që i posedon, do të dalin me vendim në mbledhje publike”, tha Nuri Bjarami, anëtar i KSHPK.
Për këtë rast qëndrim kërkuam edhe nga Komuna e Kërçovës. Thonë se nuk bëhet fjalë për kurdisje tenderi por për kompani të cilat i plotësojnë ose jo kushtet për trajtimin e qenve endacakë. Shtojnë se kompania që e ka paraqitur rastin në Antikorrupsion nuk i ka plotësuar kushtet për ta fituar tenderin edhe pse çmimin e ka pasur më të ulët.
“Janë paraqitur dy kompani, njëra nga Demir Hisari dhe tjetra nga Kërçova, kompania nga Demir Hisari ka pasur çmimin më të lartë se kompania nga Kërçova, por që kushtet e punës i ka pasur ashtu siç e parasheh ligji, kushte të cilat nuk i ka plotësuar kompania nga Kërçova. Pas kësaj tenderi është anuluar dhe është pritur ankesë nga kompanitë siç e parasheh ligji, pasi që nuk pati ankesa, tenderi u shpall përsëri ku konkurroi vetëm kompania nga Demir Hisari e cila edhe e fitoi tenderin duke plotësuar të gjitha kushtet e nevojshme”, thonë nga Komuna e Kërçovës.
Nga Komuna tregojnë po ashtu se kompania që është ankuar nuk i ka plotësuar kushtet për numër të caktuar veterinerësh, personel të mjaftueshëm dhe pajisjet e nevojshme për trajtimin e qenve, siç parashihet me ligj për kompanitë që do të merren me trajtimin e qenve endacakë.
Kujtojmë se Kërçova ballafaqohet me një numër të lartë të qenve endacak, numri i të cilëve, sipas organizatës “Grifon”, arrin në afro 1200. Komuna nuk ka një strehë për qentë endacak dhe ende nuk ka plan për ndërtimin e së njëjtës. Menaxhimi i vetëm tani për tani mbetet përmes ndarjes së mjeteve vjetore, rreth 20 mijë euro, për trajtim dhe kastrim.
