Rrahmani e lëshoi bajrakun, opozita vajton dështimin!!!

Opinione

Rrahmani e lëshoi bajrakun, opozita vajton dështimin!!!

Faton Mehmeti Nga Faton Mehmeti Më 29 shtator 2022 Në ora: 19:47
Rrahman Jashari

Tha se do të mbetet “Heroi i shekullit”, tha se nuk lëshon pe, çfarë nuk tha kryetari i SBAShK-ut, e u zotua se do e çonte deri në fund kërkesën e anëtarësisë, për 100 euro, mbajti fëmijët një muaj pa mësim, në fund po dorëzohet. Ky është Rrahman Jashari, me kërkesë të anëtarësisë që të nis mësimi nga 3 tetori. S’ka asgjë të keqe, përkundrazi është mirë që mësimi të nis, këndvështrimi ka të bëjë me parimin e korrektësisë. Rrahmani kishte mbajtur takim me Kryeministrin Kurti, më 13 shtator, menjëherë pas takimit të tridhjetë, pa u konsultuar me askënd, tha se “greva vazhdon”, duke hedhur poshtë ofertën e kryeministrit për 50 euro, këmbëngulte vetëm në 100 euro. Tani pas dy javësh, Rrahmanit i kujtohet të pranojë ofertën, për këtë tenton që të përligj veten me kërkesa të anëtarësisë.

Pse nuk e pyeti anëtarësinë edhe me 13 shtator, por menjëherë pas takimit tha, “greva vazhdon”, pse u dashka tani pas dy javësh mësim të humbur, të rikthehet në gjendjen e mëparshme. Njësoj veproi edhe në takimin e 21 shtatorit, ku së bashku me drejtoreshën e Unionit të Sindikatave të Arsimit të Evropës, Susan Flocken, takuan kryeministrin Kurti pa arritur ndonjë marrëveshje. Nga gjithë diskursi i z.Jashari, po del që s’ka pasur të bëjë fare me parime, por me pazare, sikur të blinte ndonjë veturë apo pastërma, eh kështu nuk mbahet shteti.

Mungesa e parimeve ka bërë që të humb besimi te sinqeriteti i grevës, për të cilën në fillim e kam mbështetur z.Jashari për dy arsye: së pari rritja e çmimeve dhe pastaj mos mbajtja e premtimit të qeverisë, që ligji i pagave të miratohet qysh në mars. Kërkesat ishin të drejta, por deri me 13 shtator, pastaj grevës i humbi çdo kuptim. Ditët e pas 13 shtatorit, kanë qenë shantazh ndaj Qeverisë, me fëmijët peng për t’i përdorur “mish për top”, në luftën tashmë të njohur të opozitës ndaj qeverisë. Po të ishte pyetur anëtarësi, që nga 13 shtatori, jam 100 % i bindur se do të ishin pajtuar që mësimi të niste. Rrahman Jashari kokë më vete mori vendimin për vazhdimin, kur e pa që qeveria s’po dorëzohet dhe presioni po shtohet nga të gjitha anët, po bën manovër duke përdorur mësimdhënësit për të ndërprerë grevën. Rrahmani do të bëjë çdo gjë që të nis mësimi, e di se çdo ditë që kalon vetëm sa do të zhvishet nga e vërteta që nuk ka të bëjë me grevën, së paku jo nga 13 shtatori. Gjithashtu, nëse nuk reformohet sindikata do të pësojë tkurrje edhe nga vet anëtarësia, ka nevojë të ketë ndryshim në strukturat e sindikatës, të jenë vërtetë në shërbim të punëtorëve dhe jo të ndonjë partie. Të gjitha etiketimet, të gjitha fjalët nga Qeveria dhe populli për kapjen e sindikatës nga PAN-i, po dalin të vërteta.

Rrahmani, mund të jetë burrë i mirë, por s’ka qenë i pavarur në vendimmarrje, kjo gjë e ka penalizuar duke e bërë të pabesueshëm. Divergjencat e thella që janë krijuar këto ditë mes sindikatës dhe qeverisë, nuk janë anormale nëse do të ishin për shkelje të të drejtave të punëtorëve apo që kanë të bëjnë me arsimin pa ndonjë qëllim tjetër, kur kësaj i shtohet opozita nën hije me disa përfaqësues të sindikatës në rolin e zëdhënësit, ndryshon krejtësisht hesapi. Vendi ka nevojë për reforma në të gjithë sektorët, për shkundje, ka nevojë për arsim të denjë, për paga të dinjitetshme, për sindikata të pavarura, vetëm kështu vendi ecën para. Klani “Pronto” ka pasur, dhe vazhdon ende të ketë në dorë, një pjesë të drejtësisë, arsimit, ekonomisë dhe shtyllave tjera. Çkapja sa më parë, do t’i hapë Kosovës të ardhmen e munguar.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat