Nju Jorku, u thotë Po! Edi Rama, u thotë Jo!

Opinione

Nju Jorku, u thotë Po! Edi Rama, u thotë Jo!

Nga: Beqir Sina, New York Më: 25 korrik 2025 Në ora: 06:26
Autori Beqir Sina

Ndërsa Nju Jorku zgjeroi hapësirat e jashtme të lokaleve përmes programit “Open Restaurants” për të mbështetur bizneset dhe kulturën urbane, Tirana e Edi Ramës po i shkatërron këto hapësira me urdhër nga “lart”.

Gjatë pandemisë, Nju Jorku lançoi programin “Open Restaurants”, duke lejuar restorantet të përdorin trotuaret dhe hapësirat publike për të shërbyer klientët. 

Ky program, i konsideruar shpëtimtar për rreth 100,000 vende pune dhe përfitime ekonomike, u bë i përhershëm në 2024 përmes ligjit “Dining Out NYC”. Tavolinat në trotuare jo vetëm ndihmuan bizneset të mbijetonin, por gjallëruan lagjet, duke krijuar një atmosferë tërheqëse, të ngjashme me qytetet evropiane si Parisi, Londra apo Roma. 

 

Studimet treguan se 90% e banorëve të Nju Jorkut e mbështetën iniciativën, dhe qyteti vendosi rregulla strikte për të balancuar nevojat e bizneseve dhe këmbësorëve.

Në kontrast, në Tiranë, tavolinat në trotuare dhe shtesat e vogla të lokaleve, të vendosura gjatë dhe pas pandemisë, po prishen me urdhër të Kryeministrit Edi Rama. Me 83 mandate, ai ka marrë në dorë rolin e kryeministrit, kryetarit të bashkisë dhe kryeplakut, duke marrë vendime pa konsultim me qytetarët apo pushtetin vendor. Kjo qasje ka krijuar pakënaqësi, pasi prishja e këtyre hapësirave dëmton ekonomikisht bizneset e vogla, të cilat mbështeten te tavolinat në trotuare për të rritur të ardhurat, veçanërisht tani që ata i kan ndërtuar.

Në Theth, një park kombëtar, prishja e ndërtimeve pa leje ka tensionuar banorët dhe ka ngritur dyshime për qëllime të fshehta, si favorizimi i bizneseve të mëdha. Komentuesit në rrjetet sociale kritikojnë mungesën e dialogut dhe transparencës, duke sugjeruar se aksionet e Ramës mund të jenë të nxituara dhe të pabarabarta, duke favorizuar investitorë të mëdhenj në zonat turistike si bregdeti nga Sazani në Ksamil. Në Tiranë, kufizimi i hapësirave të lokaleve ka prekur bizneset e vogla, ndërsa ato të mëdha duket se përfitojnë.

Ky centralizim i vendimmarrjes ka ngritur shqetësime edhe në Bruksel, ku përfaqësues të BE-së theksojnë se autonomia vendore është shtyllë kyçe e integrimit evropian. Kritikat fokusohen te mungesa e konsultimit me komunitetet dhe bizneset, si dhe te pasojat mjedisore dhe kulturore në Theth, ku turizmi është burim kryesor i jetesës. Edhe pse Rama ka premtuar mbështetje përmes “Paketës së Maleve”, mungesa e detajeve ka ushqyer pakënaqësi dhe teori konspirative.

Për të shmangur këto probleme, qeveria duhet të rrisë transparencën, të konsultohet me palët e interesuara dhe të hartojë plane të qarta për zhvillimin e qëndrueshëm të turizmit dhe ekonomisë lokale në Tiranë dhe Theth. 

Ndryshe nga Nju Jorku, ku dëgjimi i qytetarëve dhe rregullimi i hapësirave publike krijoi një model suksesi, qasja e ashpër dhe e pakonsultuar e Ramës rrezikon të dëmtojë bizneset dhe të krijojë pakënaqësi te qytetarët.

comment Për komente lëvizni më poshtë
Sot mund të lexoni Shfletoni kopertinat