Zgjedhja si alibi: kriza që politika po e zvarrit në Kosovë

Opinione

Zgjedhja si alibi: kriza që politika po e zvarrit në Kosovë

Nga: Isuf Bajraktari Më: 26 mars 2026 Në ora: 12:23
Isuf Bajraktari

Kosova nuk po përballet më me një krizë të zakonshme politike. Ajo po përballet me një sistem që e ushqen krizën dhe e përdor atë si mjet për mbijetesë politike.

Vendimi i fundit i Gjykata Kushtetuese e Kosovës, që i jep Kuvendit një afat 34-ditor për zgjedhjen e Presidentit, nuk është zgjidhje. Është vetëm një shtyrje e përplasjes së radhës. Një pauzë teknike në një konflikt që politika nuk po e zgjidh, sepse nuk po do ta zgjidhë.

Dekreti i Presidentes Vjosa Osmani për shpërndarjen e Kuvendit ishte pasojë e një dështimi të qartë: mungesës së numrave dhe mungesës së kompromisit. Por në vend të reflektimit, skena politike prodhoi atë që di më së miri, përplasje dhe kalkulim.

Lëvizja Vetëvendosje e dërgoi çështjen në Kushtetuese. Opozita vazhdon me bllokadë. Shumica me insistim. Secila palë mundohet të fitojë pikë politike, ndërsa shteti humb stabilitet.

Askush nuk tërhiqet. Askush nuk merr përgjegjësi.

Madje, ide të rrezikshme si “detyrimi i deputetëve” për të marrë pjesë në votim tregojnë se sa larg është larguar politika nga parimet demokratike. Demokracia nuk funksionon me urdhër, funksionon me marrëveshje.

Por marrëveshja është bërë fjalë e huaj në politikën kosovare.

Dhe ndërkohë, po përgatitet skenari i radhës: zgjedhjet.

Le të mos mashtrohemi  zgjedhje do të ketë brenda këtij afati. Por jo sepse janë zgjidhje. Përkundrazi, ato janë pjesë e lojës politike.

Zgjedhjet po përdoren si mekanizëm për të blerë kohë dhe për të bartur fajin nga njëra parti te tjetra.

“Fajin e kanë ata.”

“Jo, fajin e keni ju.”

“Ne nuk jemi përgjegjës.”

Kjo është retorika që po e mban vendin peng.

Në këtë realitet, zgjedhjet nuk prodhojnë stabilitet. Ato prodhojnë vetëm një riorganizim të krizës me të njëjtët aktorë, të njëjtat përplasje dhe të njëjtin rezultat: qeveri të brishta dhe tension të vazhdueshëm.

Problemi nuk është te Kushtetuta. Problemi është te mungesa e vullnetit për kompromis.

Kosova nuk ka mungesë rregullash. Ka mungesë respekti për to.

Dhe derisa politika të vazhdojë ta përdorë krizën si mjet dhe jo ta zgjidhë atë si detyrë, çdo proces, qoftë institucional apo zgjedhor, do të jetë vetëm një akt tjetër i së njëjtës dramë.

Në fund, pyetja nuk është nëse do të ketë zgjedhje.

Pyetja është: a do të ketë ndonjëherë përgjegjësi?

Sepse në këtë skenë politike, duket se më e rëndësishme është kush e bart fajin, jo kush e zgjidh krizën.

comment Për komente lëvizni më poshtë
Sot mund të lexoni Shfletoni kopertinat