Reprezentacioni i Maqedonisë së Veriut në futboll sonte (ora 20:45) në Palermo do të zhvillojë ndeshjen gjysmëfinale të barazhit për kualifikim në Kampionatin botëror Katar 2022, i cili do të zhvillohet në nëntor dhe dhjetor të këtij viti.
Nexhmedin Memedi, ish-reprezentus i Maqedonisë në vitet e 90-ta për Open-TV jep komentin e tij për duelin e sontëm në stadiumin “Renzo Barbera” në Palermo.
“Kombëtarja e Italisë është një skuadër e madhe. Të gjithë e dimë se kush janë italianët. Janë kampion aktual të Europës, disa herë të botës. Luajmë në teren të tyre”, deklaron Nexhmedin Memedi, i cili ndodhet në Palermo.
Megjithate, 56-vjeçari është optimist.
“Unë mendoj se futbollistët tanë do t’ju bëjnë surprizë italianëve. Mendoj se do t’ia dalim”, vijoi legjenda e futbollit të Maqedonisë.
Nexhmedin Memedi ka debutuar për Maqedoninë në një ndeshje miqësore të tetorit 1993 kundër Sllovenisë në Kranj (rezultati 1-4), e cila ishte edhe ndeshja e parë zyrtare e Maqedonisë. Ai ka zhvilluar 32 ndeshje dhe shënoi 2 gola. Ndeshja e fundit e tij për Maqedoninë ishte në miqësoren e korrikut të vitit 2000 kundër Azerbajxhani.
