Trepça fiton derbin e zjarrtë në Vushtrri

Hendboll

Trepça fiton derbin e zjarrtë në Vushtrri

Më: 19 nëntor 2022 Në ora: 23:21
Trepça

Kapiteni Sali Maxhera ka udhëhequr Trepçën drejt fitores së vështirë ndaj Vushtrrisë. Ndeshja Vushtrria – Trepça u luajt të shtunën në palestrën “Jeton Tërstena – Tota” në Vushtrri. Palestra ishte e mbushur me shikues vendas që i kanë ofruar përkrahje të madhe skuadrës nikoqire. Por pikët u takuan mysafirëve nga Mitrovica që fituan me rezultat 24:23.

Trepça e nisi më mirë ndeshjen dhe krijoi shpejtë epërsi prej katër golash, 5:1. Vushtrria u afrua në 6:5 por më pas Trepça nisi seri tjetër pozitive dhe rezultati shkoi në 15:8.

Vendasit megjithatë nuk u ndalën. Të përkrahur fuqishëm nga shikuesit, vushtrriasit janë afruar gradualisht në rezultat në pjesën e dytë. Në minutën e 55-të rezultati u ngushtua në 22:21.

Pivoti Maxhera shënoi për 23:21. Në minutën e 57-të, aloja Armend Karaça i Vushtrrisë shënoi për 23:22.

Por Maxhera shënoi sërish për 24:22, në minutën e 58-të. Në të njëjtën minutë, Fitim Klinaku shënoi për 24:23. Në sulmin vijues, Yasine Benjouida i mysafirve nuk shënoi. Kështu Vushtrria kishte edhe një sulm të fundit për të barazuar. Por gjuajtjen e Nemanja Drakuloviqit e ndali Meriton Lladrovci, portieri i Trepçës.

Sali Maxhera ndeshjen e mbylli me 8 gola. Kushtrim Kastrati i kishte 6, ndërsa nga dy gola i shënuan katër lojtarë të Trepçës.

Te Vushtrria më efikasi ishte Fitim Klinaku me 6 gola. Nga 5 i shënuan Drakuloviq dhe Felippe Teixeira.
Ndeshja i ka takuar javës së nëntë të Superligës së Kosovës.

Po të shtunën, Prishtina fitoi bindshëm ndaj Vëllaznimit. Ndeshja në kryeqytet përfundoi 42:26 për skuadrën vendase. Kastrioti e ka mposhtur Llapin në Podujevë me rezultat 37:19.
Të dielën është ndeshja Besa Famgas – Deçani.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat