Pas pjesës së parë të barabartë, lojtaret e Samadrexhës shfaqën shumë më tepër në pjesën e dytë për ta fituar derbin e xhiros së gjashtë të Superligës së Kosovës në hendboll.
Të shtunën pasdite në palestrën “Shani Nushi” në Gjakovë, Samadrexha e mposhti Shqiponjën me rezultat 34:27.
Për kampionen në fuqi, Samadrexhën, është fitorja e pestë nga po aq ndeshje të zhvilluara. Shqiponja e pësoi humbjen e parë pas dy fitoreve.
Pjesa e parë e derbit ishte plotësisht e barabartë dhe përfundoi 14:13 për samadrexhaset. Ato ishin dukshëm më efikase në pjesën e dytë dhe po ashtu më të suksesshme në mbrojtje.
Jennifer Abreu i shënoi nëntë gola për Samadrexhën. Tetë i kishte Vitoria Oliveira, kurse nga pesë i shtuan Aulona Maloku dhe Arona Krasniqi.
Celine Sia Tolno i shënoi 12 gola për Shqiponjën. Te skuadra gjakovare shtatë gola i realizoi Ana Carolini Gonçalves.
Të shtunën u luajtën edhe dy ndeshje të tjera të xhiros së gjashtë.
Ferizaj e mposhti Ulpianën me rezultatin 42:10.
Elsa Kongjeli i realizoi 16 gola për Ferizajn. Tek Ulpiana më efikasja ishte Vlerona Buja me gjashtë gola.
Në Pejë, Besa fitoi ndaj Terezës me rezultat 36:22.
Samanda Konjuhaj me tetë dhe Dorentina Qufaj me shtatë gola udhëhoqën skuadrën pejane. Melike Ipçi i shënoi shtatë gola për Terezën.