Me ftesë të Federatës Ndërkombëtare të Hendbollit, presidenti i Federatës së Hendbollit të Kosovës, Eugen Saraçini po merr pjesë në fazën finale të Kampionatit Botëror të hendbollit.
Saraçini të premten ka udhëtuar për në Stokholm të Suedisë, ndërsa është i shoqëruar nga nënpresidenti, Enis Idrizi, dhe sekretari gjeneral, Izet Gjinovci.
Delegacioni i drejtuesve të FHK-së, sonte do ta ndjekë nga afër gjysmëfinalen e Botërorit në mes të Francës e Suedisë që luhet në “Tele2 Arena” në Stokholm.
Saraçini me bashkëpunëtorë do të përcjellin nga afër edhe finalen e së dielës.
Qëndrimin në Stokholm, delegacioni i FHK-së do ta shfrytëzojë për takime të shumta me drejtues të IHF-së, EHF-së dhe federatave nacionale të vendeve të ndryshme.
