Dick Advocaat do të vazhdojë të jetë përzgjedhës i Kurasao, pasi ka nënshkruar kontratë të re me Federatën e Futbollit të këtij vendi.
Federata ka njoftuar të mërkurën se trajneri holandez ka zgjatur bashkëpunimin dhe do të qëndrojë në krye të përfaqësueses deri në korrik.
Advocaat e udhëhoqi Kurasao drejt një kualifikimi historik në Kupën e Botës, por më pas u largua nga posti. Ai u rikthye në maj, duke zëvendësuar Fred Rutten.
Kurasao nuk arriti të kalojë fazën e grupeve në Botërorin e zhvilluar në Amerikën e Veriut, duke e mbyllur Grupin E në vendin e fundit. Megjithatë, skuadra mori një pikë historike pas barazimit 0-0 ndaj Ekuadorit më 21 qershor.
“Ky është një grup fantastik për të punuar. Së bashku kemi arritur diçka të veçantë dhe mezi pres të vazhdojmë të ndërtojmë mbi atë që kemi arritur me lojtarët dhe stafin”, ka thënë Advocaat.
Trajneri holandez pritet të bëjë së shpejti publike listën e lojtarëve për ndeshjet e ardhshme të Ligës së Kombeve të CONCACAF, ku Kurasao do të përballet me Kosta Rikën, Nikaraguan dhe Trinidad e Tobagon.
