Pas përfundimit të angazhimeve të Kombëtares, vëmendja rikthehet në Superiore, ku Dinamo përgatitet për një seri prej katër ndeshjesh të rëndësishme në kampionat. Blutë do të kenë përpara një kalendar interesant, me sfida që mund të ndikojnë në ecurinë dhe objektivat e skuadrës në vazhdimësinë e sezonit.
Në katër takimet e ardhshme, Dinamo do të përballet fillimisht me Elbasanin, më pas me Partizanin, për të vijuar me transfertën ndaj Laçit dhe sfidën kundër Vllaznisë. Ndeshja e parë është programuar më 22 nëntor, ndaj AF Elbasanit. Një përballje që pritet të jetë mjaft interesante, duke pasur parasysh rivalitetin mes dy skuadrave dhe rëndësinë e pikëve në këtë fazë të kampionatit.
Vetëm pak ditë më vonë, Dinamo do të presë Partizanin në një tjetër sfidë të rëndësishme. Derbi pritet të sjellë emocione dhe rivalitet, me të dyja skuadrat që do të kërkojnë të marrin maksimumin nga kjo përballje. Më pas, blutë do të udhëtojnë drejt Laçit, ku do të luajnë ndeshjen e tretë të këtij kalendari. Ndërsa seria e katër takimeve do të mbyllet kur Dinamo të përballet me Vllazninë, në një tjetër sfidë me peshë për kampionatin. Një element interesant i këtij kalendari është edhe fakti se Dinamo do të zhvillojë tri nga katër ndeshjet në “Elbasan Arena”.
Dy prej tyre do t’i luajë në rolin e skuadrës pritëse, ndërsa në përballjen me AF Elbasanin do të jetë udhëtuese, pavarësisht se takimi zhvillohet në të njëjtin stadium. Pra, për blutë vjen një periudhë me katër përballje të rëndësishme, ku tri prej tyre do të zhvillohen në Elbasan Arena. Një mundësi për Dinamon që të shfrytëzojë njohjen me fushën dhe të synojë një ecuri sa më pozitive në rikthimin e kampionatit pas pushimit të Kombëtares.
FAZA E PARË- Një tjetër element që e bën edhe më interesante kalendarin e ardhshëm të Dinamos është bilanci i regjistruar në fazën e parë përballë këtyre katër kundërshtarëve. Blutë kanë arritur të zhvillojnë një ecuri mjaft pozitive në ndeshjet e para ndaj Elbasanit, Partizanit, Laçit dhe Vllaznisë duke marrë 9 pikë nga 12 të mundshme. Skuadra dinamovite e nisi këtë cikël përballjesh më 6 shtator, kur priti Elbasanin dhe arriti të triumfojë me rezultatin 2-1, duke marrë tri pikët e para ndaj një kundërshtari që do ta ketë sërish përballë në rikthimin e kampionatit.
Vetëm pak ditë më vonë, më 12 shtator, Dinamo dhuroi një tjetër paraqitje bindëse, këtë herë në transfertën ndaj Partizanit (luajtur në Vorë). Blutë arritën të fitonin në derbi me rezultatin 4-2, në një ndeshje ku skuadra siguroi një fitore me vlerë të veçantë. Seria pozitive vijoi edhe më 19 shtator, kur Dinamo priti Laçin dhe regjistroi një tjetër sukses, këtë herë me shifrat 3-1. Me tri fitore në tri ndeshjet e para, skuadra kishte grumbulluar pikët maksimale dhe dukej se kishte gjetur ritmin e duhur përballë këtyre rivalëve.
Megjithatë, seria u ndërpre në përballjen me Vllazninë, e zhvilluar më 11 tetor, ku shkodranët arritën të fitonin minimalisht 1-0, duke i shkaktuar Dinamos humbjen e vetme në këtë cikël që vinte pas 4 fitoreve radhazi. Në total, në këto katër takime të fazës së parë, blutë shënuan 9 gola dhe pësuan vetëm 5, duke konfirmuar një bilanc pozitiv si në aspektin e rezultateve, ashtu edhe në atë ofensiv.
Tashmë, me nisjen e fazës së dytë të përballjeve, Dinamo do të ketë mundësinë të rikthehet përballë të njëjtëve kundërshtarë, këtë herë me synimin për të ruajtur ose përmirësuar atë që arriti në ndeshjet e para. Tri fitoret ndaj Elbasanit, Partizanit dhe Laçit janë një pikë referimi pozitive për skuadrën, ndërsa sfida me Vllazninë mbetet një motiv shtesë për të kërkuar reagimin dhe për të marrë pikët e lëna në përballjen e parë.
Nëse do të arrijë të përsërisë bilancin prej tri fitoresh dhe një humbjeje, Dinamo do të siguronte sërish 9 pikë nga kjo seri prej katër ndeshjesh. Megjithatë, objektivi i bluve mund të jetë edhe më ambicioz pasi të shfrytëzojnë momentin, të marrin maksimumin në çdo përballje dhe të përmirësojnë bilancin e fazës së parë, në një periudhë që mund të rezultojë mjaft përcaktuese për vazhdimësinë e kampionatit.