Trepça e ka fituar duelin e skuadrave me traditë në hendbollin e Kosovës. Të shtunën mbrëma në Ferizaj, mitrovicasit fituan ndaj Kastriotit me tri gola dallim, 29:26. Ndeshja i takoi javës së dytë të Superligës së hendbollistëve.
Te fitorja, Trepça erdhi në pjesën e dytë. Pas 30 minutave lojë rezultati ishte 15:13 për Kastriotin. Por në pjesën e dytë mysafirët nga Mitrovica shfaqën më shumë dhe fituan me rezultat 29:26.
Pivoti Sali Maxhera udhëhoqi Trepçën me 9 gola. 5 gola i shënoi Kushtrim Kastrati, ndërsa nga 4 i kishin Alban Shabani e Anton Maloku.
Te Kastrioti më efikasi ishte Hamdi Salihu me 7 gola. 6 gola i realizoi Festim Mustafa, kurse nga 4 i kishin Aldi Rudari e Adonit Isufi.
Për Trepçën ishte fitorja e dytë. Për Kastriotin humbja e parë.
Me rivalitet ishte edhe ndeshja në Podujevë në mes të Llapit e Deçanit. Fitore shënoi Llapi me 33:31. Pas pjesës së parë rezultati ishte 17:16 për llapjanët.
Besjan Abazi me 10 gola, Blerton Hasani me 9 dhe Mërgim Ademi me 7 udhëhoqën Llapin. Te Deçani u dallua Drilon Tahirukaj me 11 gola. 5 i kishte Valmir Selmani, ndërsa nga 4 i shënuan Arion Tanushi e Mirsad Jashari.
Kampionia, Besa Famgas, ka shënuar fitore të pritur ndaj Rahovecit. Rezultati i ndeshjes në Pejë ishte 37:23 për vendasit. Kastriot Jupa shënoi 6 gola për Besën, ndërsa nga 5 i kishin Arbios Mushkolaj e Denis Shabanoviq. Te Rahoveci 6 herë shënoi Alban Haziri, derisa nga 4 gola i kishin Egzon Vuqitërna e Besmir Kusari.
