Zbulohen kundërshtarët e mundshëm të Kombëtares së Kosovës

Hendboll

Zbulohen kundërshtarët e mundshëm të Kombëtares së Kosovës

Më: 17 nëntor 2022 Në ora: 22:19
Pamje nga një ndeshje

Kombëtarja e Kosovës në hendboll të shtunën e mëson kundërshtarin në fazën e dytë kualifikuese për Kampionatin Botëror të vitit të ardhshëm. Të kujtojmë që hendbollistet tona arritën sukses historik duke e kaluar Kombëtaren e Ishujve Faroe në fazën e parë.

Të shtunën prej orës 13:00 tërhiqet shorti për fazën e dytë kualifikuese. Shorti hedhet në Lubjanë, ku zhvillohet faza finale e Kampionatit Evropian.

Kroacia, Spanja, Gjermania, Hungaria, Maqedonia e Veriut, Polonia, Rumania, Sllovenia dhe Zvicra janë kundërshtaret e mundshme të Kosovës. Këto të gjitha janë kombëtare që luajtën në Evropianin që po mbahet ende. Janë në vazon e parë për short, ndërkohë që Kosova është në vazon e dytë. Pos Kosovës në vazon e dytë janë edhe Çekia, Austria, Sllovakia, Islanda, Turqia, Ukraina, Portugalia, Greqia e Italia.

Kosova do të përballet në dy ndeshje me një Kombëtare të vazos së parë. Dhe nëse e kalon pengesën e radhës, kualifikohet në Botëror, që do të ishte sukses i jashtëzakonshëm.

Ndeshjet e para luhen më 7/8 prill të vitit të ardhshëm, ndërsa ato të kthimit më 11/12 prill. Përmes shortit do të përcaktohet cila kombëtare do të jetë vendase në ndeshjen e parë.

Në vazon e parë është edhe Serbia, por EHF-ja nuk lejon ndeshjet Kosovë – Serbi.

Botërori mbahet pas një viti, ndërsa organizatoret, Danimarka, Norvegjia dhe Suedia kualifikohen direkt. Norvegjia është edhe kampione në fuqi. Direkt janë kualifikuar edhe Franca, Mali i Zi dhe Holanda, në bazë të plasmanit në Euro 2022. Dhjetë Kombëtare tjera evropiane do të përcaktohen përmes fazës së dytë kualifikuese.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat