Nuk ka dhënë fitues ndeshja e mbetur e xhiros së gjashtë të Superligës së Kosovës në hendboll (meshkujt) në mes të Kastriotit dhe Rahovecit.
Të mërkurën në Ferizaj, këto dy skuadra luajtën baras, 26:26.
Ndeshjen e hapën më mirë mysafirët që krijuan epërsi prej 3:0. Por vendasit u kthyen shpejtë dhe deri në fund të pjesës së parë u luajt ndeshje e barabartë. Pas minutës së 30-të rezultati ishte 14:12 për Rahovecin. “Vreshtarët” vazhduan me lojë të mirë dhe në fillim të pjesës së dytë krijuan avantazh 16:12. Por Kastrioti barazoi në 17:17.
Në minutën e 53-të, Kastrioti kaloi në epërsi 22:21 e më pas edhe 24:23. Shifrat u barazuan sërish në 24:24 e 25:25. Në minutën e 59-të, Adonis Isufi i Rahovecit shënoi për 26:25, kurse në minutën e njëjtë Jeton Bilsimi i
Kastriotit shënoi golin e fundit të ndeshjes, përkatësisht për 26:26.
Festim Mustafa ishte më efikasi te Kastrioti me 8 gola. Nga 5 i shënuan Kristijan Anastasovski dhe Beni Sula.
Te Rahoveci më së shumti gola realizoi Alban Haziri, gjithsej 8. Adonit Isufi i shënoi 5 gola, ndërsa 4 i kishte Mali Luzha.
Të mërkurën u luajt edhe ndeshja Vushtrria – Besa Famgas, që ishte e mbetur e javës së shtatë. Fitore shënoi Besa që kështu vazhdon me bilanc maksimal në Superligë. Pejanët fituan me rezultat 34:23. Besa Famgas ka avancuar prej fillimit dhe vazhdimisht ka mbajtur epërsi të lartë.
Victor Alonso ishte më efikasi te Besa me 8 gola. Felippe Teixeira i shënoi 7 gola për Vushtrrinë.
