Federata Evropiane e Hendbollit (EHF) ka marrë vendim për të gjobitur Federatën e Hendbollit të Kroacisë dhe selektorin e saj, Dagur Sigurdsson, pas incidenteve të regjistruara gjatë Kampionatit Evropian të fundit.
Selektori Sigurdsson është gjobitur me 4.000 euro për deklarata të konsideruara fyese ndaj EHF-së gjatë konferencës zyrtare për media në gjysmëfinale.
Prej kësaj shume, 2.000 euro janë me kusht për një periudhë dyvjeçare.
Ndërkohë, Federata Kroate e Hendbollit është dënuar me 10.000 euro për shkelje të protokollit gjatë ceremonisë së ndarjes së medaljeve dhe për shfaqjen e një flamuri të paautorizuar në podium.
Edhe këtu, 2.500 euro janë me kusht për dy vite.
Sipas vendimit të EHF-së, të dyja palët kanë të drejtë ankese në Gjykatën e Apelit të EHF-së brenda 7 ditëve.
Ky vendim vjen si vazhdim i tensioneve që shpesh shoqërojnë garat e mëdha të hendbollit evropian, sidomos kur bëhet fjalë për organizim dhe protokolle zyrtare.