Fakulteti i Shkencave Matematikore dhe Natyrore (FShMN) i Universitetit të Prishtinës, do të bëhet me hapësira të reja, pasi sot është vënë gurthemeli i këtij objekti.
Ky investim i cili është i financuar nga BE-ja, UNOPS-i dhe Universitetit i Prishtinës “Hasan Prishtina”, po konsiderohet si një mundësi e mirë për të rritur cilësinë në arsim të lartë, e veçanërisht në hulumtime.
Kryeministri i Kosovës, Albin Kurti hedhjen e gurthemelit të këtij fakulteti e konsideroi si faqe të re për zhvillimin e UP-së por edhe atë socio-ekonomik të vendit.
Shefi i ekzekutivit kosovar theksoi se politikat në fushën e arsimit që tashmë i kanë hartuar synojnë fuqizimin dhe reformimin e sistemit arsimor.
Kurti: Gurthemeli i sotëm një faqe e re në historinë e zhvillimit të UP-së
“Uroj që gurthemeli që po vëmë sot të jetë edhe një faqe e re në historinë e zhvillimit të Universitetit të Prishtinës si dhe e zhvillimit të gjithmbarshëm socio-ekonomik të gjithë vendit tonë. Arsimi është investimi më i rëndësishëm për të ardhmen e shtetit tonë e shoqërisë sonë dhe shtylla kryesore për zhvillimin e qëndrueshëm ekonomik. Politikat në fushën e arsimit që tashmë i kemi hartuar synojnë fuqizimin dhe reformimin e sistemit arsimor duke filluar nga edukimi në fëmijëri të hershme e deri tek arsimi i lartë e gjatë gjithë jetës. Rritja e cilësisë është objektiv në të gjitha nivelet e arsimit e kur flasim për arsim të lartë fjalët kyçe të politikave tona për të arritur këtë rritje të cilësisë janë integriteti, standardet, kriteret dhe performanca”, tha Kurti.
Shefi i Zyrës së BE-së në Kosovë, Tomas Szunyog u shpreh se ndërtimi i këtij objekti kontribuon në rritjen e cilësisë në mësim dhe mbështet fushën e hulumtimeve.
Për këtë projekt të cilin BE e ka financuar me 9 milionë euro, Szyunyog u shpreh se ndërtimi i këtij fakulteti është pjesë e agjendës evropiane për punësim dhe arsim.
Szunyog: Ky projekt do t’i kontribuojë direkt rritjes të cilësisë në mësim
“Ky projekt financohet nga BE dhe UP dhe synon një ambient modern me 13 mijë metra katror që do të gëzoj afërisht do të zë 2300 studentë dhe 103 pjesëtarë të stafit dhe ka për qëllim që të përmbush standardet ndërtesë me efiçiencë dhe praktika që do të ndikojnë dukshëm për zvogëlimin e konsumimit të energjisë në ndërsa dhe emetimit të dioksid karbonit. Kur të përfundojë kjo ndërtesë e re e fakultetit do ta përmirësojë infrastrukturën e Universitetit të Prishtinës, do të ofrojë ambient të sigurt dhe miqësor duke përfshirë zonat e gjelbra për përfitim të komunitetit. Kjo nuk është vetëm ndërtesë e re por edhe përmirësim i shëndetit të studentëve dhe mirëqenies së studentëve... Ky projekt do t’i kontribuoj direkt rritjes të cilësisë në mësim dhe mbështet një shkallë më të lartë të hulumtimeve, mësimin në bazë të hulumtimeve dhe mësimdhënies”, tha ai.
Se ndërtimi i hapësirave të reja universitare krijon kushte për studentët e stafin akademik tha ministrja e Arsimit, Shkencës, Teknologjisë dhe Inovacionit, Arbërie Nagavci.
Duke shtuar se përmirësimi i sistemit të arsimit është prioritet i saj, Nagavci theksoi se pret që ky investim do të rrisë cilësinë e studimeve.
Nagavci: Ndërtimi i këtij objekti do të krijojë faqe të re për UP
“Kur vendosen gurthemele të institucioneve edukativo-arsimore, të universiteteve, të instituteve jo se vetëm krijohen kushte për studentët, stafin akademik dhe hulumtuesit por edhe ndikohet në demokratizimin e shoqërisë dhe zhvillimin e saj... Sot po vendosim gurthemel të ndërtimit të këtij objekti tejet të rëndësishëm, i cili besoj edhe unë që do të krijojë një faqe të re për UP-në... Ndërtimi i këtij objekti të ri është një mundësi e shkëlqyer që të vazhdohet me rrugën përpara, është angazhim që na takon ta përmbushim dhe në shenjë të ndërgjegjësimit për shkencat natyrore në vendin tonë“, tha Nagavci.
Rektori i Universitetit të Prishtinës “Hasan Prishtina”, Qerim Qerimi u shpreh se me ndërtimin e hapësirave të reja po kontribuohet në modernizimin e arsimit të lartë në Kosovë.
Qerimi: Me këto hapësirat e reja po kontribuojmë në modernizimin e arsimit të lartë në Kosovës
“Me këtë ne sot po nisim ndërtimin e hapësirave të reja për një fakultet i cili ka shkruar një histori disadekadëshe të kontributit të pashoq në arsimimin e të rinjve dhe të rejave të këtij vendi... Duke ndërtuar hapësirat e reja përmes këtij projekti ne po kontribuojmë në modernizimin e arsimit të lartë në Kosovës, ngritjes së kapaciteteve hulumtuese të studentëve të stafit, promovimit të barazisë gjinore përfshirjes dhe hapësirave të përputhshme me hapësirat e përputhshme mjedisore”, u shpreh Qerimi.
Në vënien e gurthemelit tëFakultetit të Shkencave Matematike dhe Natyrore (FShMN) mori pjesë edhe kryetari i Prishtinës, Përparim Rama e përfaqësues nga UNOPS.
