AAK konfirmon Zenun Elezajn si kandidat për kryetar të Klinës

Kosova

AAK konfirmon Zenun Elezajn si kandidat për kryetar të Klinës

Më: 2 qershor 2025 Në ora: 18:45
Zenun Elezaj, Ramush Haradinaj

Kryetari aktual i Klinës, Zenun Elezaj, do të kandidojë për një mandat të ri katërvjeçar në krye të komunës. Këtë e bëri të ditur kreu i Aleancës për Ardhmërinë e Kosovës (AAK), Ramush Haradinaj, i cili tha se Këshilli i Përgjithshëm i Degës së AAK-së ka propozuar sot Elezajn për vazhdimin e udhëheqjes në komunë.

Haradinaj vlerësoi punën e Elezajt dhe ekipit të tij, duke theksuar se ata kanë dhënë një shtytje të jashtëzakonshme zhvillimit dhe përparimit të Klinës. Ai përmendi edhe përvojën e suksesshme në Suharekë, ku nën drejtimin e Bali Muharremajt qytetarët kanë përjetuar transformim në shërbime dhe infrastrukturë.

“Komunat ku udhëheq Aleanca janë shembull i qeverisjes së mirë, të ndershme dhe të përgjegjshme,” tha Haradinaj, duke shtuar se kjo traditë do të vazhdojë edhe në komunat e tjera ku AAK do të qeverisë.

Kandidimi i Elezajt vjen në përvjetorin e 25-të të themelimit të Aleancës në Klinë dhe synon të vazhdojë punën dhe vizionin që kanë sjellë rezultate konkrete për komunën.

comment Për komente lëvizni më poshtë
Sot mund të lexoni Shfletoni kopertinat