Zëvendëskryetari i Komunës së Vitisë, Hasan Aliu, i shoqëruar nga Komisioni Komunal për vlerësimin e dëmeve në ekonomitë familjare dhe bujqësi nga fatkeqësitë natyrore, ka pritur sot në takim Komisionin Qendror për vlerësimin e dëmeve nga fatkeqësitë natyrore dhe fatkeqësitë e tjera, të udhëhequr nga Kastriot Lajqi.
Sipas njoftimit nga kjo komunë, gjatë takimit u diskutua në veçanti për vlerësimin e dëmeve në ekonomitë familjare, dëmet në bujqësi si dhe ato në biznese në territorin e Komunës së Vitisë, si dhe për mundësitë e kompensimit të dëmeve të shkaktuara kryesisht nga reshjet e shiut dhe borës.
“Ndërkohë, Sami Demelezi, kryetar i Komisionit Komunal për vlerësimin e dëmeve nga Vitia, foli për punën e realizuar nga ky komision, duke bërë të ditur se raporti përfundimtar i është dorëzuar kryetarit të komunës dhe Kuvendit Komunal të Vitisë, i cili është shqyrtuar në mbledhjen e fundit të këtij organi”, thuhet në njoftim.
Tutje thuhet se në përfundim të takimit, të dy komisionet u pajtuan që bashkëpunimi të vazhdojë edhe në të ardhmen, me qëllim që procesi i vlerësimit dhe kompensimit të dëmeve të realizohet në përputhje me legjislacionin në fuqi të Republikës së Kosovës.
