Dr. Fadil Cana, drejtori aktual i Klinikës për Sëmundje Infektive në Shkup dhe një figurë e njohur në fushën e mjekësisë, po shqyrtohet seriozisht si kandidat i mundshëm për kryetar të Komunës së Gostivarit në zgjedhjet lokale të vitit 2025, mëson INA.
Iniciativa për kandidaturën e tij vjen nga koalicioni opozitar shqiptar VLEN, që këtë periudhë po shqyrton kandidaturat për të garuar nëpër komunat shqiptare në zgjedhjet lokale të tetorit.
Dr. Cana është i njohur për rolin e tij gjatë menaxhimit të krizave shëndetësore, sidomos gjatë pandemisë së COVID-19, por edhe për përvojë konkrete menaxheriale. Emri i tij viteve të fundit ishte përmendur edhe si ministër i shëndetësisë si kuadër i ASH-së.
Burime brenda strukturave të VLEN-it bëjnë të ditur se emri i Dr. Canës është diskutuar seriozisht, ndonëse ende nuk ka një konfirmim zyrtar për kandidaturën.
Kandidimi eventual i Dr. Canës mund të ndryshojë dinamikat e garës në Gostivar, një bastion tradicionalisht i mbajtur nga forca të mëdha politike shqiptare.
Në pritje të një vendimi zyrtar, pritet që koalicioni VLEN të intensifikojë diskutimet në javët në vijim.
