Gashi uron 22 Nëntorin: Gjuha shqipe është nyjë unifikimi dhe bartëse e historisë

Maqedonia

Gashi uron 22 Nëntorin: Gjuha shqipe është nyjë unifikimi dhe bartëse e historisë

Nga: A.M. Më: 22 nëntor 2026 Në ora: 12:19
Afrim Gashi

Kryetari i Kuvendit të Maqedonisë së Veriut, Afrim Gashi, ka uruar 22 Nëntorin, Ditën e Alfabetit të Gjuhës Shqipe, duke vlerësuar rëndësinë historike të Kongresit të Manastirit dhe kontributin e rilindësve shqiptarë në unifikimin e alfabetit.

Në mesazhin e tij, Gashi theksoi se Kongresi i Manastirit i vitit 1908 shënoi një kthesë vendimtare për gjuhën, arsimin dhe identitetin kombëtar shqiptar.

Ai vlerësoi se vendimi i rilindësve shqiptarë ishte më shumë se një arritje gjuhësore, pasi përfaqësonte një akt uniteti dhe përgjegjësie ndaj brezave të ardhshëm.

“Gjuha e mishëron identitetin e një populli. Për shqiptarët, mbetet gjithmonë nyjë unifikimi, bartëse e historisë dhe shprehje e pandashme e dinjitetit të popullit”, ka shkruar Gashi.

Duke folur për rëndësinë e gjuhës shqipe në Maqedoninë e Veriut, ai u shpreh se ajo përfaqëson edhe një urë komunikimi, mirëkuptimi dhe bashkëjetese ndërmjet qytetarëve.

Gashi, në cilësinë e kryetarit të Kuvendit, theksoi gjithashtu përgjegjësinë për garantimin e barazisë, respektimin e identitetit gjuhësor e kulturor dhe përfaqësimin e drejtë.

“Këto janë vlera themelore për ndërtimin e një shteti demokratik, të drejtë dhe gjithëpërfshirës”, theksoi ai.

Në fund, Gashi uroi të gjithë shqiptarët, kudo që ndodhen, për Ditën e Alfabetit të Gjuhës Shqipe.

Sot mund të lexoni Shfletoni kopertinat