Shqiptarët kudo, në mbështetje të kauzës së studentëve në Shqipëri

Opinione

Shqiptarët kudo, në mbështetje të kauzës së studentëve në Shqipëri

Nga: Gani Qarri Më: 18 tetor 2026 Në ora: 10:09
Protesta

Kjo fundjavë, duhet të jetë dita "D" e realizimit të ndryshimeve në Shqipëri, jetësimit të kauzës së shenjtë të rinisë e të studentëve shqiptarë dhe ndarja përfundimtare e vendit nga neokomunizmi, akt të cilin e kanë detyrim moral dhe obligim njerëzor e patriotik ta mbështesin dhe ndihmojnë në të gjitha mënyrat, shqiptarët kudo në trojet tona etnike, diasporë dhe mërgatën tonë, që ta shpëtojnë rinin shqiptare nga keqtrajtimi i mëtejmë policor dhe nga veprimtaria e dyshimtë mafioze e Edvin Ramës, për tjetërsimin demografik e kombëtar të atdheut të shqiptarëve.

Në fakt qeveria e mykur e Edvin Kristaq Ramës kishte mbi 135 ditë në disponim për tu dakorduar e marrë vesh qetësisht me protestuesit paqësor dhe bërë ndryshimet e nevojshme të kërkuara në mënyrë njerëzore prej tyre, por ai i nënçmoi e përqeshi në format më të ulëta dhe injoroi fare ata, ndaj dhe ndodhi ky shpërthim i madh i mllefit të grumbulluar ndër vite, me fuqizimin e kërkesës për dorëheqje të parevokueshme nga pozita e kryeministrit të një kryemafiozi që tash e sa kohë, po merr nëpër këmbë një popull të pafaj dhe qon drejt shpopullimit masiv nga shqiptarët tërë shtetin shqiptar.

Protesta është e drejt e garantuar e qytetarëve e cila nuk guxon të shfrytëzohet nga policia e Edvin Ramës për keqtrajtimin banditesk të shqiptarëve, por megjithëse demonstratat për dorëheqjen e parevokueshme të Edvin Kristaq Ramës, tash e sa kohë në Shqipëri po vazhdojnë, dhe bashkë me to vazhdon dhe keqtrajtimi i shqiptarëve, çuditërisht në Kosovë vijon të heshtet edhe më tej paturpësisht nga zyrtarët partiak dhe shtetëror. 

Sot kudo në botën perëndimore Shqipëria është i vetmi vend në Evropë ku përflitet publikisht, se si Edvin Kristaq Rama, si në asnjë vend tjetër në rajon e më gjerë, për të siguruar përfitimet maksimale për vete nga shpëlarja e parave të pista në ndërtim e gradaçela, tendera, rrugë, karburante deri te industria ushqimore etj, ka favorizuar aq shumë bandat kriminale dhe narkomafinë, sa që ata tanimë kanë futur nën kontroll të gjithë shtetin shqiptar dhe e bëjnë vet edhe ligjin për çdo gjë, akt që ka nxitur frustërim e pakënaqësi aq të thellë në shoqëri, sa që u shndërrua në shkak të patejkalueshëm edhe për shpërthimin e këtyre protestave masive të studentëve dhe rinisë në Shqipëri.

Protestat e zhvilluara pas një kohe kaq të gjatë, tanimë janë kthyer në kauzë për ndryshim, të cilën shqiptarët e të gjitha trojeve tona etnike e përkrahim fuqimisht, e mbështesin fort dhe do të qëndrojnë pa asnjë rezervë, në favor të realizimit të saj, deri në fund. 

Shqipëria nuk është pronë private dhe as trashëgimi e dhuruar me “tapi” Edvin Ramës nga i ati Kristaqi-s, ndaj studentët dhe rinia protestuese në Shqipëri, përkundër jargëvitjeve të gërditshme të disa pseudo-intelektualëve, pseudo-politikanëve, e madje edhe neokomunistëve në Kosovë, se kinse shqiptarët jashtë kufijve londinez të shtetit shqiptar, nuk u dashka të përzihen në zhvillimet atje, nuk mund ta ndalojnë as kushtëzojnë mbështetjen e pakursyer të të gjithë shqiptarëve kudo janë, në trojet tona etnike dhe diasporë, që e përjetojnë në shpirt po aq rëndë të keqen, njëjtë si të rinjtë e të rejat dhe vëllezërit e motrat tona të cilët të detyruar nga halli, tash e sa kohë po protestojnë në Shqipëri.

Shqiptarët në Dardani dhe trojet tona tjera etnike, kanë arsye dhe të drejtë morale e njerëzore si dhe obligim kombëtar të bashkëndjejnë me studentët dhe rininë në Shqipëri-shtetin amë të të gjithë shqiptarëve, të përkrahin kërkesat e drejta studentore për dorëheqjen e Edvin Ramës dhe mbështesin kauzën për ndryshim të rinisë shqiptare atje, jo vetëm me fjalë, por edhe me vepra, duke shprehur solidarizim praktik dhe organizuar protesta edhe në qytetet e vendbanimet e tyre, si dhe duke marr pjesë edhe fizikisht në protestat kombëtare në Shqipëri, përkrah vëllezërve e motrave tona shqiptare në përpjekjet për realizimin e kauzës së tyre dhe sjelljen e ndryshimeve të domosdoshme politike, për një të ardhme më të mirë të Shqipërisë dhe jetë të sigurt e dinjitoze të shqiptarëve në vendin e vet.

Është shumë interesant të shihet se si edhe në këto momente të vështira që po kalon shteti ynë amë-Shqipëria, edhe neokumunistët e Kosovës të cilët kërcënojnë Kosovën me grushtshtet, granata e bomba dore, derisa na flasin ditë e natë me shumë nostalgji romantike për vuajtjet e tyre të "stërmëdha" duke na shti në "gjynah" edhe me legjenda të padëgjuara dhe thurur vetes anekdota e elegji mitike për bëma të qëna e të paqëna, të njëjtit të hidhen me kaq kokëfortësi, në mbrojtje të një narkomafiozi në Shqipëri, si Edvin Kristaq Rama, i cili ua ka pru shpirtin te hunda shqiptarëve.

Protestat studentore për çlirimin e Shqipërisë nga kapja e narkomafisë më të rrezikshme në tërë Ballkanin Perëndimor, bandat e krimit të organizuar të shpërndara në gjithë botën, në grupe të mirëstrukturuara dhe veprimtari sistematike narkomafioze, përfshi veprimet edhe në vendet mike, si dhe një kryemafioz i tipit të karteleve latino-amerikane, cili pasi dëboi mbi 1 milion shqiptar nga Shqipëria, nuk hezitoi ta nxjerr në ankand publik edhe Shqipërinë, nuk guxon të përdhoset nga ata që çdo natë na flasin për vuajtjet e veta “mitike” në televizionet shqipfolëse me adresa në vendet fqinje, e kërcënojnë Kosovën me grushtshtet dhe bomba e granata lufte.

Ndërsa njerëzit të cilët me këtë rast, në asnjë mënyrë nuk duhet të përzihen dhe nuk guxojnë të marrin pjesë fizikisht në protestë, janë politikanët e opozitës, opozita e përçarë dhe e shkapërderdhur si mos më keq në Shqipëri, ka dështuar që me kohë, ndaj nuk duhet ti bëhet pengesë as ngarkesë protestës, ngase studentët dhe rinia shqiptare, janë në kërkim të ndryshimeve dhe jo të rikthimit të opozitës në pushtet.

Studentët dhe rinia në Shqipëri po dëshmojnë se duan udhëheqjen ndryshe të Shqipërisë, dëshirojnë një udhëheqje vërtetë demokratike, një klasë të re politike, forcë progresive prijëse dhe ndarjen përfundimtare nga kasta e vjetër e partive të dështuara neokomuniste.

Shqiptarët janë lodhur me pozitën dhe opozitën, ata duan reforma politike dhe forca të reja në krye të shtetit, kështu që nëse opozita shqiptare, vërtetë i dëshiron ndryshimet në Shqipëri, duhet tu bëjë thirrje të gjithë shqiptarëve, pa dallim bindjeje dhe partie, ti bashkohen protestës studentore, për realizimin sa më parë, me sa më pak vuajtje e peripeci dhe me sa më shumë sukses të kauzës së drejtë të rinisë shqiptare, pa dërgimin e sejmenëve të saj në mjediset e studentëve protestues, prania e të cilëve më tepër pengon dhe ngarkon, se sa e ndihmon protestën.

Ndaj me këtë rast u bëjë thirrje edhe njëherë të gjithë veprimtarëve shqiptar, organizatave civile e grupeve aktive në vend dhe gjithandej në mërgatë, që të solidarizohen me Rininë Protestuese në Shqipëri dhe të organizojnë marshe përkrahjeje e protesta mbështetëse kudo jetojnë e punojnë, në shenjë solidarizimi me vëllezërit e motrat protestuese shqiptare në Tiranë dhe sheshet e rrugët e të gjitha qyteteve të Shqipërisë, që po dëshmojnë në vepër se janë shpresa më e sinqertë e të ardhmes tonë dhe krenaria më e ndritshme e kombit shqiptar kudo.

comment Për komente lëvizni më poshtë
Sot mund të lexoni Shfletoni kopertinat