Feller mungon edhe në sllallomin e Gurglit

Skijim

Feller mungon edhe në sllallomin e Gurglit

Nga: B.S. Më: 20 nëntor 2026 Në ora: 14:04
Skiatori Manuel Feller.

Rikthimi në gara i Manuel Fellerit po shtyhet sërish.

Skiatori 34-vjeçar austriak ka vendosur të mos marrë pjesë as në sllallomin e Kupës së Botës, që do të zhvillohet të dielën në pistën e Gurglit.

“Shkurtimisht, thjesht nuk jam ende gati”, deklaroi Feller të premten pas stërvitjes në Tirolin e Otztalit.

Feller, i cili kishte triumfuar në Gurgl në vitin 2023, tashmë synon rikthimin në garën e sllallomit që do të zhvillohet pas tri javësh në Val d'Isère të Francës.

Probleme të shumta shëndetësore

Austriaku e kishte përfunduar para kohe sezonin e kaluar, në muajin mars, pas Lojërave Olimpike.

Ai ishte përballur me disa probleme serioze shëndetësore, përfshirë:

Dhimbje të nervit shiatik, si pasojë e disa hernieve diskale. Hernie inguinale.
Inflamacion të kockës pubike.

Për këtë arsye, Feller vazhdon të jetë i kujdesshëm me rikthimin në gara dhe nuk dëshiron të nxitojë para se të jetë plotësisht i gatshëm.

Synimi i tij i radhës është gara në Val d'Isère, ku shpreson të rikthehet në pistë pas tri javësh.

Sot mund të lexoni Shfletoni kopertinat