Michelle Gisin: Dy momente të arta dhe lamtumira e hidhur

Skijim

Michelle Gisin: Dy momente të arta dhe lamtumira e hidhur

Më: 3 nëntor 2026 Në ora: 13:06
Skiatorja zvicerane, Michelle Gisin

Dy medalje të arta olimpike, një fitore në Kupën e Botës dhe shumë momente të bukura e të vështira: një vështrim pas në karrierën e Michelle Gisin.

Para pak vitesh, familja Gisin përfaqësohej në Kupën e Botës nga tre anëtarë. Tani, pas Dominique dhe Marc, edhe Michelle Gisin ka vendosur t'i japë fund karrierës. 32-vjeçarja u detyrua të marrë këtë vendim për shkak të aksidentit të rëndë gjatë stërvitjes në muajin dhjetor, në Corviglia.

Michelle bëri gjithçka që ishte e mundur për t'u rikthyer. Ajo iu përkushtua rehabilitimit dhe punoi shumë për rikuperimin. Por lëndimet ishin tepër të rënda edhe për një sportiste me karakterin e saj luftarak: këputja e ligamentit të kryqëzuar dhe atij të brendshëm të gjurit, dëmtime në kyçin e dorës dhe një lëndim i rëndë në shtyllën kurrizore të qafës.

Semmeringu, vendi i suksesit

Ky është një përfundim i pafat për një karrierë në skijim që zgjati pothuajse 18 vjet.

Që në moshën 15-vjeçare, sportistja nga Engelbergu mori pjesë në garat e para të nivelit FIS. Garën e saj të parë në Kupën e Botës e zhvilloi në dhjetor të vitit 2012, në sllallomin e Semmeringut.

Semmeringu ishte gjithashtu vendi ku Gisin arriti fitoren e vetme individuale në Kupën e Botës. Në vitin 2020, në sllallomin e natës, ajo ishte më e shpejta dhe la pas edhe Mikaela Shiffrin.

Kjo fitore erdhi në një sezon kur ajo tashmë nuk përqendrohej vetëm te sllallomi, por garonte edhe në disiplinat e shpejtësisë.

Ndër cilësitë më të mëdha të Gisin ishin gjithanshmëria dhe qëndrueshmëria fizike. Të dyja ishin të domosdoshme për të garuar në të katër disiplinat e Kupës së Botës.

Por 32-vjeçarja nuk merrte pjesë vetëm në gara, ajo arrinte edhe rezultate të shkëlqyera. Në të gjitha disiplinat u ngjit në podium.

Në fund të karrierës së saj, bilanci përfshin 22 podiume në 291 gara të Kupës së Botës. Për shumë vite, ajo ishte një nga shtyllat kryesore të ekipit zviceran Swiss-Ski, një sportiste që duhej llogaritur në çdo garë.

Prania e saj si në disiplinat teknike, ashtu edhe në ato të shpejtësisë, i solli sukseset më të mëdha të karrierës.

Në disiplinën e kombinimit alpin, e cila gradualisht u zhduk nga programi i Kupës së Botës gjatë karrierës së saj, Gisin fitoi medaljen e artë olimpike në vitin 2018 në Pyeongchang dhe në vitin 2022 në Pekin.

Këtyre dy medaljeve të arta olimpike iu shtua edhe medalja e bronztë në Super-G në vitin 2022.

Në Kampionatet Botërore, sportistja shumëdisiplinore nuk arriti ta fitonte titullin e kampiones, por fitoi dy medalje:

Argjend në Kampionatin Botëror të vitit 2017 në St. Moritz, në kombinimin alpin.

Bronztë në Kampionatin Botëror të vitit 2021 në Cortina d'Ampezzo, po ashtu në kombinimin alpin.

Familja, mbështetja e saj më e madhe

Në intervistat e saj, Gisin është shfaqur gjithmonë e sinqertë dhe autentike, duke përcjellë natyrën e saj të gëzuar.

Edhe në periudhat më të vështira të karrierës, ajo nuk i fshehu vështirësitë dhe pranoi se ndonjëherë kishte frikë edhe kur ishte në ski.

Kjo nuk ishte pa arsye. Për shkak të lidhjes së ngushtë me vëllain dhe motrën, ajo i kishte përjetuar nga afër pasojat e aksidenteve të Dominique dhe Marc. Pikërisht familja ishte ajo që i qëndronte pranë sa herë që përballej me vështirësi.

Megjithatë, frika nuk e pengoi kurrë të provonte sfida të reja. Ajo eksperimentonte vazhdimisht për t'u përmirësuar, analizonte veten, guxonte të ndërmerrte hapa të rinj dhe, kur ishte e nevojshme, ndryshonte drejtimin.

Në periudhën e fundit, ajo kishte vendosur të largohej nga sllallomi për t'u përqendruar në disiplinat e shpejtësisë.

Edhe vendimi për t'u tërhequr nga sporti përputhet me karakterin e dy herë kampiones olimpike.

Ajo punoi jashtëzakonisht shumë për t'u rikthyer në ski. Për Gisin, largimi nga sporti duke qëndruar vetëm në shtratin e fizioterapisë nuk ishte një mundësi e pranueshme.

Ajo dëshironte të rikthehej vetë në borë dhe vetëm atëherë të vendoste nëse mund të vazhdonte edhe një herë në nivelin më të lartë.

Tani këtë e ka bërë – dhe ka vendosur t'i japë fund karrierës.

Bilanci i karrierës së Michelle Gisin
Medalje të arta olimpike 2 
Medalje olimpike të bronzta 1 
Medalje në Kampionatet Botërore 2
Fitore individuale në Kupën e Botës 1
Podiume në Kupën e Botës 22
Gara në Kupën e Botës 291

Sot mund të lexoni Shfletoni kopertinat