Sulmuesi Jajah Kalon është futbollisti që mahniti dje me fanellën e Genoas në fitoren ndaj Cagliarit në “Sardenja Arena” me rezultatin 0:1.
Sulmuesi 19-vjeçar nga Sierra Leone u aktivizua për herë të parë në Serinë A duke debutuar me fanellën e skuadrës nga Liguria në minutën e 46′ duke zëvendësuar ish-lojtarin e Juventusit Marko Pjaca. Kalon kaloi në avantazh skuadrën kuqeblu, por goli i tij u anulua nga VAR-i për fatin e tij të keq.
Historia e djaloshit nga Sierra Leone është tepër e trishtë ku nëpërmjet kanaleve zyrtare të klubit të Xhenoas ai ka rrëfyer historinë e tij sesi ka mbërritur në Itali, ku në moshën 14-vjeçare është larguar nga Sierra Leone për të shmangur një fat tragjik duke shkuar në Itali me anije:
“Në vendin tim në Sierra Leone ekziston një grup terrorist që rrëmbejnë fëmijët për t’i kthyer në ushtarë dhe prindërit e mi kishin frikë se mund të më ndodhte edhe mua kështu që ata vendosën të më linin që të largohesha. Ishte e vështirë, nuk doja por ishte gjëja më e mirë.
Për të paguar kalimin tim nga deti kam punuar, nga pastrimi i shtëpive te puna e muratorit dhe kur arrita të mbledh mijëra dinarë që më duheshin, më vodhën, kështu që unë duhej ta filloja nga e para. Mbërrita në Itali në Lampeduza, pastaj në Xhenoa dhe Piemonte.”
Prova me skuadrën e Entelës shkoi keq, por Xhenoa vendos të vërë bast për të dhe e grumbullon në ekipet e të rinjve: “Jam shumë i lumtur, trajneri dhe shokët e skuadrës më kanë dhënë shumë besim për të dhënë ende më shumë.”, përfundoi Kalon.
