Një Europian që luhet në 11 qytete korrespondon edhe me kombëtare që do t’i luajnë ndeshjet në shtëpi.
I tillë është rasti në ndeshjen e parë të Grupit B, ku Danimarka do të presë Finlandën me start nga ora 18:00. Nën gjykimin e anglezit Entoni Tejlor, në “Parken Stadium” të Kopenhagenit danezët do të shpresojnë që nën regjinë e Kristian Eriksenit, të mund t’ia dalin mbanë në sfidën e parë të “Euro 2020”.
DANIMARKA – Fantazisti i Interit rigjen habitatin e tij të lumturisë, teksa me Danimarkën vendoset në rolin e trekuartistit, aty ku është më pranë portës dhe mund të shpalosë të gjithë talentin e tij. Për trajnerin Hjulmand, vetëm humbja nuk merret në konsideratë për këtë sfidë.
“Nuk ka justifikime për këtë ndeshje. Nuk mund të humbasim e të themi se nuk ia dolëm dot se nuk ishim përgatitur si duhet. Duhet të japim gjithçka në fushë për t’ia dalë mbanë. E duam më shumë sesa kundërshtari fitoren në këtë ndeshje dhe do të bëjmë më të mirën tonë për të dalë triumfatorë”, tha trajneri i Danimarkës.
