Granit Xhaka beson se largimi i tij kundër Manchester City ishte i padrejtë dhe ishte i surprizuar nga vendimi i gjyqtarit.
Mesfushori i Arsenalit u ndëshkua në ndeshjen e së shtunës kundër City pas një ndërhyrje të ashpër ndaj Joao Cancelo.
Ai u ndëshkua me karton direkt të kuq nga gjyqtari duke e lënë skuadrën me 10 futbollistë të cilën “Gunners” në fund e humbën me rezultat 5-0.
Duke folur për agjencinë zvicerane të lajmeve ‘Keystone-SDA’, Xhaka sugjeroi se ishte i tronditur nga largimi me të kuq.
Ai tha: “Për kartonin e kuq: i befasuar brutalisht! Në Premier League njerëzit shpesh flasin për forcën angleze.
“Unë godita topin 100 përqind dhe mora një karton të kuq. Fotografitë nuk u kontrolluan nga VAR. Unë kam parë ndërhyrje më të ashpra që as nuk u vlerësuan si faull”, ka theksuar ai.
Xhaka dhe Arsenali e kanë nisur sezonin e Premier Ligës në formë të vështirë. Ata janë mundur nga Brentford, Chelsea dhe City, duke mos shënuar asnjë gol në këtë proces, gjersa e kanë mposhtur West Brom në raundin e dytë të Kupës Carabao me rezultat 6-0.
